Erreferentzia indizearen onarpena begi onez hartu du PSE-EEk
Errenterian etxebizitzaren egoera "larria" dela esan dute sozialistek eta aurrera urratsa sozialisten etxebizitza politikei esker egin dela.
Gipuzkoako tentsio handiko eremuetako alokairuaren prezioa mugatzeko erreferentzia indizea argitaratu izana begi onez hartu du alderdi sozialistak. Horren atzean, Eusko Jaurlaritza eta Espainiako Gobernua jarri ditu, “haien elkarlanari esker Errenteriak espekulazioari galga jartzea ahalbidetu eta alokairuan bizi diren herritarrentzat prezio justuagoak bermatzeko izango du tresna berria”.
Lorpena, oinarrizkoa izanik ere, ez dela bere horretan nahikoa izango adierazi du Isaac Palencia sozialisten bozeramaleak, “Errenteriako Udalak bere arura hartu eta etxebizitza publiko eta eskuragarriaren eskaintza areagotzeko neurriak hartu behar ditu”.
Etxebizitzaren egoera udalerrian “larria” dela esan du, bestalde, “950 eurotik gorako alokairu prezioak ditugu eta etxebizitza eskaintza hutsala. Ez da nahikoa beste erakundeek sustatutako neurriak txalotzea, titularretatik ekintzetara pasa behar du EH Bilduk”. Horrekin lotuta, Errenteriako Udalak ondutako hiru urterako etxebizitza planari “anbizio nahikoa” ez izatea bizitegi larrialdiari erantzuteko egotzi dio, “presazkoa da ekintza zehatzak abiatzea”.
Horren harira, Gamongoari egin dio erreferentzia. 2007an onartutako garapen urbanistikoa babestutako etxebizitza eraikitzeko sozialisten apusturik garrantzitsuena izan zela esan du Palenciak, “700 etxebizitza eraikitzea aurreikusten zen eta ia %75 babestuak. Proiektuak blokeatuta jarraitzen du eta uste dugu onartezina dela Errenteriako familia askoren egoera arintzeko oinarrizkoa delako”.
Topoaren kotxera zaharrak babestutako etxebizitza eraikitzeko espazio gisa ere proposatu dituzte sozialistek, “Euskal Trenbide Sarea (ETS) lurrak Eusko Jaurlaritzari lagatzeko eskatu diogu. Horrekin batera, etxebizitza hutsa mobilizatzeko neurrien beharra eta etxebizitzen birgaitzea sustatzea auzo guztietan ezinbestekoa iruditzen zaigu”.
