Pentsio publikoen defentsan jarraitzen dute kalean
Zazpi urteko borrokaldi luzearen bidez hainbat lorpen eskuratu badituzte ere, oraindik orain "oinarrizko eta ezinbesteko" diren beste arlo asko zintzilik direla esan dute pentsiodunek.
Pentsiodunak gaur kalean.Duintasuna Zazpi urteko borrokaldi luzearen bidez hainbat lorpen eskuratu badituzte ere, oraindik orain “oinarrizko eta ezinbesteko” diren beste arlo asko zintzilik direla esan dute pentsiodunek. Gaur berriro atera dira kalera, hileko lehen astelehenero egiten duten moduan, pentsio duinak eta bizitzako nahikoak eskatzeko, baina baita herritar guztien ongizaterako ezinbestekoak diren zerbitzu publiko duinak exijitzeko.
Pentsioen balioa handitu eta murrizketak bertan behera uztea lortu dutela jarri dute nabarmen gaurko protestan, baita premiazko aldarrikapen asko ez direla aintzat hartu ere, “gainera, eraso berriak daude mahai gainean”. Horien artean urtarrilean KPIaren araberako errebalorizazioak bertan behera uzteko saiakera egin zutela hainbat alderdik ekarri dute gogora, “PSOE, Sumar, ERC, EAJ CC, UPN, eta PPk11/2024 dekretua onartu zuten, pentsiodunak lan bizitza luzatzera behartuz lan prekarioa eta pentsio eskasa uztartuz”.
Murrizketak aurreikusi dituzte gainera, gerrako gastuak Barne Produktu Gordineraino igotzeko erabakiengatik, “erabaki horiek murrizketak ekarriko dituzte zerbitzu eta prestazio publikoetan zein pentsioetan. gero eta esku gutxiagotan aberastasuna pilatzearen eta baliabideez jabetzeko gerren aurka gaude. Palestinan egiten ari diren genozidioa da politika horren frogarik odoltsuena”.
Gasteizko Legebiltzarrean izan berritan, Espainiako hiriburua dute orain begiz jota. Izan ere, hilaren 25ean berriro pentsio publiko duinak eta nahikoak eskatzeko manifestazioa egingo dute Madrilen. Protesta horretan gaurko pentsiodunentzat eta datozen belaunaldientzat egingo dute pentsio duinen eskaera. Zazpi dira egingo dituzte eskaera zehatzak: Lanbide arteko gutxieneko soldataren adineko gutxieneko pentsioa, eta hori batez besteko soldataren %60 izatea; genero arrakala “eskandalagarria” behingoz bukatzea; Gizarte Segurantzaren kontuen auditoretza; pentsioen balioa KPI errealaren arabera handitzea eta galdutako eros ahalmena berreskuratzea; pribatizaiorik ez, ez enpleguko pentsio planei; penalizazio gabeko erretiro aurreratuak 40 urteko kotizazioarekin; euro bakar bat ez armamenturako ezta gerrarako ere, “gastu militarrak, helburu sozialetarako”.
