Oarsoaldeko Oinherriren lehen topaketa, Pasaian
Oinherri Euskal Herriko herri hezitzaileen sarea da, eta udalerriak eta aisia, hezkuntza, kultura eta euskara arloko eragileak biltzen ditu. Topaketa hilaren 1ean izan zen, Donibanen.
Hilaren 1ean, Oarsoaldeko Oinherriren lehen topaketa egin zen Donibaneko Juanba Berasategi aretoan. Oinherri Euskal Herriko herri hezitzaileen sarea da, eta udalerriak eta aisia, hezkuntza, kultura eta euskara arloko eragileak biltzen ditu herri hezitzailearen kontzeptua saretzeko. Herri hezitzailearen ideia espazio publikoa ikasketa gune gisa ulertzen duen eta komunitatearen parte hartze aktiboa hezkuntza prozesuetan sustatzen duen eredua da.
Donibaneko topaketan Errenteria-Oreretako, Lezoko, Oiartzungo eta Pasaiako ordezkari politiko eta teknikoek hartu zuten parte, Gipuzkoako Foru Aldundiko eta Oarsoaldea Garapen Agentziako kideekin batera. Ordezkari guztiek oinarriak ezarri zituzten udalerrien arteko lankidetza eredu berri bat ezartzeko.
Iragan asteazkeneko jardunaldia bi zatitan banatu zen. Lehenengoan, Oinherrik herri hezitzailea kontzeptuaren gaineko azalpen teorikoa eman zuen, eta aldundiko teknikariek ekintza komunitarioaren marko teorikoa aurkeztu zuten.
Bigarren zatian, dinamika parte hartzaileen bidez, udalerri bakoitzeko ordezkariek hazi proiektuak landu zituzten. Hazi proiektuak Oinherriren filosofia modu praktikoan islatzen duela adierazi dute sustatzaileek: “Komunitatearen parte hartzea eta euskararen erabilera sustatzen dituzten egitasmo hezitzaileak dira, eta gaur egungo abiapuntutik proiektu hezitzaileago eta komunitarioago bilakatzeko gaitasuna dute”.
Topaketako azken une garrantzitsua hazi proiektu guztien aurkezpena eta partekatzea izan zela jakinarazi dute parte hartzaileek. Prozesu horri esker, udalerrien artean errepikatzen diren behar eta erronka komunak identifikatu zituztela nabarmendu dute, eta eskualde osoaren ikuspegitik hezkuntza ulertzeko “modu integral eta zabalerantz” urrats bat eman zuten, “ohiko eskolaren mugak gaindituz”.
Etorkizunerako konpromisoa argia dela zehaztu dute sustatzaileek: “Erronka komun horiei elkarrekin heltzen jarraitzea eta horiek eskualdearen garapenerako aukera bihurtzea”. Gauzak horrela, udalerri eta eragileen arteko loturak sendotuko direla baietsi dute, Oinherriren sarearen helburuekin bat eginez.
