Donibaneko kiroldegiaren klub erabiltzaileak: "Zer zoritxar gertatu behar da arazoak konpontzeko?"
Kezka dute Donibaneko kiroldegia erabiltzen duten klubek. Instalazioa "egoera negargarrian" dagoela uste dute, eta soluzioak eskatu dizkiote Pasaiako Udalari.
Kezka dute Donibaneko kiroldegiaren erabiltzaile diren herriko klubek. Uste dute egoera eskasean dela kirol azpiegitura, “zaintzarik gabe dago eta narriadura egoera negargarria da”. Hori esateko joan den asteburu euritsuan izan zuten esperientzia jarri dute adibidetzat: “Urez betetako korridoreak, hautsitako aldagela eta bainuak, sabaitik erortzen den uragatik balio ez duen taberna bat, itoginak pistan…”. Udalari gutun irekia bidali diote klub horiek, kiroldegiaren hobekuntzan arreta jar dezan. Donibane Eskubaloia, Sanpedrotarra AF, Antxo AF eta Donipari Kirol Elkartearen izenean dago sinatuta eskaera testua. “Zer zoritxar gertatu behar da arazoak konpontzeko?”, galdetu diote udal erakundeari. Joan den asteburukoa, urte luzetan duten arazo baten adibidea besterik ez dela adierazi dute.
Onartu dute instalazioan konponketa “puntualak” egin direla, “epe laburrerako adabakiak” kluben ustez. “Hori dela eta, instalazio horien gutxieneko segurtasun eta mantentze baldintzak eskatzen ditugu, eta, zoritxarrez, urteetan zehar luzatuz joan den arreta falta dela eta, gaur egun konponketa garrantzitsuak behar ditu. Guk, kirol arduradun eta instalazio publiko horien erabiltzaile garen aldetik, premiazko neurriak har ditzatela eskatzen diegu horien arduradunei”.
Lau klub horien artean bederatzi talde dituzte. Entrenamenduetarako eta partidetarako erabiltzen dute kiroldegia, eta tokiko mailetan nahiz handiagoetan ari dira horien taldeak. Sinatzaileek nabarmendu dute Eskola Kirolaren barruko jarduerak ere izaten direla han, “haiek izan beharko lukete arreta handiena, gure eskualdeko haurrak baitira zerbitzu horretaz gozatzen dutenak”.
Taldeei dagokienez, euren eguneroko nahiz asteburuetako jardunean kiroldegiaren egoera oztopo dela adierazi dute. Gainera, zehaztu dute Pasaiatik kanpoko talde eta kirolari asko datozela bertara, “Pasaia bisitatzen duten gainerako taldeen eta epaileen aurrera irudi penagarria azaltzen dute instalazioek, beti harritzen dira egoera horrekin”.
Baina klubek ez dute arreta bakarrik jarri gehien erabiltzen dituzten espazioetan, kantxan edo aldageletan adibidez. Harmailei ere kasu egin diete, esanaz kiroldegiak dituen bi harmailetako bat itxita dagoela haren gainean den sabaia erortzeko arriskuan dagoelako. “Harmaila horretatik bakarrik dago mugikortasun urriko pertsonentzako sarbidea”. Hobetu beharrekoen artean bestelako eremu batzuk zerrendatu dituzte: “Espazio asko eta asko ez dira erabiltzen, utzikeria egoeran daudelako: arraunerako fosa, squash pista, edo gimnasia aretoa, esaterako”. Erantsi dute fatxadako hainbat leiho hautsita daudela, eta ezin direla itxi.
“Gure herrian kirolak osasun ona du azken urteotan, eta uste dugu udaleko arduradunen aldetik ez dela behar bezainbestekoa izan jarri den arreta. Ezin dugu onartu espazio hori, gure komunitatearen garapenerako eta ongizaterako motorra izan beharko lukeena, hondatzen jarraitzen utzi”, esan dute kirolariek.
