Astelehenean hasiko dira Azkueneko parkearen birnaturalizazio prozesuarekin
Domingo Blanco parkea "espazio bizi, naturalizatu eta inklusibo" bihurtzea da obra horien xedea. Lanek 36.915,29 euroko aurrekontua dute.
Pasaiako Udalak jakinarazi duenez, Trintxerpeko Azkueneko biribilgunean dagoen parkearen birnaturalizazio proiektua datorren astean abiatuko da. 36.915,29 euroko aurrekontua dute lanek, eta Domingo Blanco parkea “espazio bizi, naturalizatu eta inklusibo” bihurtzeko asmoz egingo dituzte berrikuntzak.
Azaldu dutenez, proiektu horrek gaur egungo jolas eta aisialdirako eremua osatuko du natura oinarri duen gune ireki batekin. Hots, gehitu dute proiektuaren oinarrizko irizpidea eremuaren naturalizazioa dela; hau da, ahal den heinean landare egiturak barneratuko dituzte dauden zuhaitzak babestu edota integratuz, eta espazioa elementu naturalekin egituratuko dute. Hortaz, material natural eta “gertukoa” erabiliko dute.
Bestalde, udaletik aipatu dute lanen ardatz nagusiak lursailaren egokitzapena, landare autoktonoen erabilera eta egurrezko egiturak izango direla, eta haurrek bertan “esploratzeko, sormena lantzeko eta elkarrekin aritzeko” aukera izango dutela “modu libre eta seguru batean”.
Horretaz gain, proiektuak belaunaldien arteko bizikidetza sustatzen duela gehitu dute. Horretarako, egurrezko bankuak eta esertzeko nahi etzateko egitura informalak jarriko dituzte.
Iraitz Pazos, Hirigintza, Zerbitzu eta Ingurumeneko zinegotzia: “Azkueneko parkea berritzeko proiektu honek ez du soilik eremua estetikoki hobetuko, baizik eta haurren garapen emozionala, soziala eta fisikoa sustatuko duen ingurune natural bat eskainiko du. Gure helburua da Pasaia osoko espazio publikoetan naturarekiko harremana berreskuratzea eta gure haurrek naturarekin jolasteko aukera geroz eta gehiago izatea”.
Aipatutakoaz gain, jakinarazi dute birnaturalizazioaren diseinua “jolas aske eta inklusiboaren printzipioetan” oinarritzen denez, ume guztientzat irisgarriak izatea helburu duten eremuak sortuko dituztela.
Pazos: “Uste dugu haur parkeek ez dutela soilik jolas funtzioa izan behar. Garrantzitsua da espazio hauek hezkuntza eta osasun ikuspegitik ere lantzea, naturaren bidez ikaskuntza eta ongizatea sustatuz. Gainera, sortuko dugun egitura berriak aukera ematen du belaunaldien arteko elkarbizitza eta partekatzea ere indartzeko”.
Finean; lanekin hilaren 13an hasiko dira, eta gutxi gora behera hiru asteko epean amaitzea aurreikusi dute. Oraingoz ez dute alboko haur parkea ixtea aurreikusten, baina udalak jakinarazi du obraren arabera posible dela une jakin batzuetan eremuren bat itxi behar izatea.
Proiektuaren xehetasun gehiago ikusteko, egin klik hemen.
