Buruarinen tailerrak egingo dituzte datozen egunetan
2019, 2020 eta 2021 urteen bueltan jaiotako familiei zuzendutako ekintza da. Izena eman behar da aldez aurretik.
Bokale Pasaiako Euskararen Aholku Batzordeko Familia bidezko euskararen transmisio lan mahaiak sustatuta, Gau Beltzeko buruarinen tailerrak egingo dute Pasaian, datozen egunetan.
Antolatzaileek argitu dutenez, Gau Beltza Euskal Herriko ohitura bat da, “ez da Halloween jaiaren euskal bertsioa”, eta Santu Guztien Egunaren bezperan eta Hilen Egunean zenbait ohitura zeudela zehaztu dute. “Badira kontakizunak, kalabazak edo arbiak hustu, aurpegi itxura eman, kandela txiki bat sartu eta bide bazterretan argiztatuta jartzen zirenekoak; bizilagunak beldurtu eta hildakoen arimei bidea erakusteko jarriak”, jarraitu dute.
Hortaz, antolatu dituzten jardueren helburua Gau Beltzeko buruarin bat egitea izango da gurasoen laguntzarekin; 2019, 2020 eta 2021. urteen bueltan jaiotako haurrei zuzendutako hitzorduak dira. Tailerrak euskaraz izango direla nabarmendu dute, baina euskaraz ulertzen ez duten gurasoek ere parte hartzeko aukera izango dute, bitartekoak jarriko baitituzte horien ulermena bermatzeko.
Haur bakoitzak guraso baten laguntza beharko duenez buruarina egiteko, buruarin bakoitzeko izen emate bat egin beharko da, hemen.
Buruarinak egiteko tailerrak
- Pasai Donibane.
- Hilak 26, 11:00, Pasai Donibaneko kulturgunean. Izena emateko azken eguna: hilak 21.
- Pasai San Pedro.
- Hilak 26, 17:00, udal aretoan. Izena emateko azken eguna: hilak 21.
- Pasai Antxo.
- Hilak 18, 10:30, Kultur Etxean. Izena emateko azken eguna: hilak 13.
