Elkartasunez bete da Gernika plaza
Juneren Hegoak Eguna ari dira ospatzen; ordu biak bitartean puzgarriak eta zenbait tailer dituzte. Arratsaldean, berriz, magoa, pailazoa eta musika.
Juneren Hegoak Eguna ospatzen ari dira gaurkoan, eta, ez da nolanahiko eguna, jende andana elkartu baita elkartasuna adierazteko topaketa horretan. Egiten duten lana ikusarazi, boluntario eta laguntzaileen aitorpena aitortu, eta lanerako prest dagoen jende berriarengana hurbiltzea direla euren helburuak zioten elkarteko kideek gaurko egunaren atarian; bada, asmoak ondo betetzen ari direla dirudi, Gernika plaza jendez gainezka baitago.
Goizeko hamaiketan eman diote hasiera aurtengo edizioari, ordu horretan jarri baitituzte martxan puzgarriak zein eskulanak eta aurpegia margotzeko tailerrak. Alabaina, photocalla egiteko eta mahai tenisean jokatzeko aukera ere izan dute dozenaka herritarrek.
Alazne Mendikute arduradunak goizeko lehen orduan azaldu du hasieran ez dela jende asko bertaratu, baina jakitun dira eskola kirola dagoelako izan dela. Haatik, pozik daude, eguraldia lagun izanda ziurtasunez baitakite jendea “urtero bezala” gerturatuko dela eurengana. Gaurko eguna beren jarduna eta elkartea ikusarazteko egiten dute, Mendikuteren hitzetan “beharrezkoa baita gure ekintza kalera ateratzea”.
Minutuak pasa ahala jendea hurbiltzen joan da, eta elkartekoak adierazi du “pozik” daudela.
Egun solidarioa da gaurkoa, eta horren adierazle dira Gernika plazan produktu solidarioen postuak jarri dituzten elkarteak, Abarka, BPAN, Mindara, Naizen eta Pausoko, hurrenez hurren. Noski, Juneren Hegoak berak ere badu bere postua, eta haren produktuak eskuratu nahi dituenak eurenera bertaratu baino ez du egin behar; kamisetak, jertseak eta poltsak bezalako elementuak dituzte salgai.
Jendeak ondo ezagutzen du Juneren Hegoak eguna, baina aurtengoan bada berrikuntzarik; izan ere, Edu Magoarekin magia ikuskizuna, Motx pailazoaren emanaldia eta DJ Ostok-en saioa izango dira arratsaldean. Gainera, ezaguna den zozketa solidarioa ere egingo dute gaurkoan, urtero moduan. Zozketa hori arratsaldeko DJaren saioa baino lehen egingo dute, eta sariak hilabeteko epean eskuratu ahal izango dira.
Errenteria-Oreretako Gernika plaza eremu solidario bihurtu da gaurkoan, eta Mendikutek jendeari bertaratzeko deia egin dio: “Ea jendea etortzen den gurekin ondo pasatzera eta kolaboratzera”.
HITZA Juneren Hegoak Eguneko goizeko ekitaldietan izan da, eta zenbait irudi bildu ditu.
Juneren Hegoak Eguna
- 11:00-14:00. Puzgarriak, eskulanak, aurpegia margotzeko tailerra, photocalla eta mahai tenisa.
- 16:00. Magia ikuskizuna Edu Magoareki.
- 17:15. Motx pailazoaren emanaldia.
- 18:30. DJ Ostok.
