Herriko merkataritza, ostalaritza eta zerbitzuak indartzeko, Lezo Bonua
Astelehenean (hilak 13) jarriko dute martxan bonua, eta haren helburua da, finean, hurbileko merkataritza indartzea eta udalerriko ekonomian eragin positiboa izatea da.
Lezo Bonua aurkeztu zuten atzo Mikel Arruti Lezoko alkateak eta Lezokoak elkarteko kideek, eta argi utzi zituzten haren helburuak zein diren: hurbileko merkataritza indartzea, tokiko kontsumitzaileen fideltasuna saritzea eta udalerriko ekonomian eragin positiboa izatea. Atzoko agerraldian eman zituzten nondik norako guztiak, eta azaldu zuten herriko merkataritza, ostalaritza eta zerbitzuak indartzeko modua dela egitasmo hori. Aurreko edizioetan tresna eraginkorra izan dela sinetsita, “gogotsu” daude udala eta Lezokoak elkartekoak kanpaina
hasteko.
Bonu bakoitzak 3,5 euroko prezioa du, eta 5 euroko erosketak egin daitezke harekin; hortaz, 1,5 euroko aldea udalak hartuko du bere gain. Bonuak, bestalde, hilaren 13tik azaroaren 30era baino ezingo dira ibili, eta horretarako 18 urte izan behar dira, gutxienez.
Bestalde, bonu bakoitza erosi den salmenta puntuan bertan erabili beharko da, eta gutxienez 5 euroko erosketa egin behar da horretarako. Alabaina, erosketaren prezioa erabiliko diren bonuen zenbatekoa baino txikiagoa bada, ez dute eskudirutan itzuliko.
Establezimendu hauetan egongo da bonuak erosteko aukera: Garbiñe arraindegia, Itsaso ileapaindegia, Kimaya estetika ekologikoa, Luma estetika, Orekan, Panpox ileapaindegia, Petit arropa denda, Sara farmazia, Sorgin taberna, Taloka kafetegia, Tiñelu taberna, Titare mertzeria, Ttantta bitxitegia, Txingurri taberna, Xarma ileapaindegia, Zaldiak jatetxea eta Zubitzo janari denda.
Lezoko Udalak, Lezokoak Merkatari, Ostalari eta Zerbitzuen elkarteak zein Oarsoaldea Garapen Agentziak egitasmo honetan parte hartzera animatu dituzte herritarrak. Bonuaren inguruko informazio gehiagorako, egin klik hemen.
