Pio Baroja eraikina bereganatzeko prozesua abiatu du udalak
Ikastetxe izateari aspaldi utzi bazion ere, Eusko Jaurlaritzaren Hezkuntza sailaren beharrei lotuta jarraitzen du formalki; 2007-2008 ikasturtean desafekzio eskaera egin zion udalak Hezkuntza sailari, baina ezezkoa jaso zuen.
Pio Baroja eraikinaHerri Bizia Ikastetxe izateari aspaldi utzi bazion ere, Eusko Jaurlaritzaren Hezkuntza sailaren beharrei lotuta jarraitzen du formalki Pio Baroja eraikina, eta hura bere egiteko prozesua abiatu du Errenteriako Udalak. Ez da honakoa saiakera egiten duen lehen aldia, 2007-2008 ikasturtean desafekzio eskaera egin zion udalak Hezkuntza sailari, baina ezezkoa jaso zuen. Egungo egoeran, Hezkuntza sailak eraikina erabiltzeko beharra balu, berak izango luke lehentasuna eta erabakimena.
Eraikina bere egin ahal izateko prozesuaren lehen urratsa egin du udalak orain, eraikinaren desafekzioa eskatzea. Lehen eskaera egin eta ezezkoa erantzun zuenetik hezkuntza arlokoak ez diren beste erabilera batzuk baimendu ditu udalak, 2009an Eusko Jaurlaritzarekin sinatutako lankidetza hitzarmenaren barruan. beretan ari dira Aljarafe Andaluziako Kultur Zentroa, albatros Aeromodelismo elkartea, Latigo Boxeo kluba, edota Kamelamos Adiquerar elkartea.
Eskaera onartzekotan, udalak erabaki ahalko du zein jardueretara bideratu eraikina, eta behar diren birgaitze lanak egin ahal izango ditu. Antzeko prozesua egin zuen udalak Aldakoenea eraikinarekin. Pio Baroja eraikina eskuratzeko ahalegina Galtzaraborda Biziberritzeko Planarekin lotu du udalak, izan ere, eraikina elementu esanguratsua dela prozesu horretan adierazi du. Planak jasotzen dituen lan ildoen artean daude espazio publikoa eraberritzea eta zerbitzu irisgarriak bermatzea. Horregatik jasotzen dira, besteak beste, Urdaburu parkea eraberritu eta naturalizatzeko proiektua edota haur eskola berria eraikitzeko asmoa. Urdaburu Parkearen eraberritzea integrala izan dadin, ordea, Udalak nahi du esku hartzearen parte izan daitezen Pio Baroja eraikina eta honen ingurua ere.
Auzoaren biziberritzerako azpiegitura estrategikoak direla iritzita, udalak auzotar eta parkearen zein Pio Baroja eraikinaren erabiltzaileekin batera landu nahi ditu, bai Urdaburu Parkean, zein Pio Baroja eraikinean egin beharreko esku hartzeak. Galtzaraborda Plana garatzeko eta planean jasotako inbertsio estrategikoak gauzatzeko laguntza garrantzitsua jaso berri du udalak, izan ere, 2,4 milioi euro jaso ditu FEDER funtsetatik. Funts horiek bultzada garrantzitsua dira planak aurrera egin dezan.
