Herriko gai eta gune estrategikoen berri izan du aldundiak
Gipuzkoako Foru Aldundiko diputatuen kontseiluak batzarra egin du gaur herrian. Herrian mugarri diren proiektuen berri izan dute herrialdeko hautetsiek.
Eider Mendoza diputatu nagusia eta Aizpea Otaegi alkatea, gaur, Lekuona atarian. Gipuzkoako Foru Aldundiak diputatuen kontseilua egin du gaur Errenteria-Oreretan. Aldundiaren gidaritza daramaten diputatuek batzarra egin dute goizean Badalab Hizkuntza Berrikuntza Laborategian, eta ondoren, Lekuona Fabrika ezagutu dute Dejabu konpainiak sortutako audio bidezko euskarriaren laguntzarekin, cicerone lanean edo gidaritzan Aizpea Otaegi alkatea zutela. Badalabeko bilkura aurretik batzartuta izan dira Eider Mendoza diputatu nagusia eta alkatea, elkar partekatu dituzte herriari dagozkion hainbat gai estrategiko lan-bileran. Madalen kaleko Joxepa Antoni Aranberri anitzeneko bilera bukatuta Lekuona Fabrika eta barnebiltzen duen kultur-proiektua ezagutu dute Gipuzkoako hautetsiek.
Alkateak esker hitzak izan ditu diputatu nagusi eta gobernu kontseiluarentzat. Haien bilkura ibiltarietarako Errenteria-Orereta hautatu izana goretsi du, eta zehaztu du bilkura horren aurretik ahaldun nagusiarekin “Errenteriarentzat estrategikoak diren proiektuei buruz” hitz egiteko tartea izan duela, “eta Errenterian izan eta gure etorkizunean estrategikoak diren bi proiektu ezagutarazteko aukera ere izan dugu”. Badalab eta Lekuona Fabrika izan dira bi egitasmo horiek. “Eskerrik asko hurbiltasunagatik, eta Errenteriaren berri emateko aukeragatik”, esan du Oategik.
Gustura izan da herrian Eider Mendoza. Hala adierazi du bere hitz tartean. “Gipuzkoako Foru Aldunditik esker hitzak eskaini nahi dizkiogu Errenteriako Udalari. Argi dugu gerturatzeak egin behar ditugula herrietara, elkar ezagutzeak asko errazten dituelako gauzak, eta besteak beste harremanak. Elkarren berri izateak proiektuak komunean martxan jartzeko aukera ematen du”.
Mendozak aipatu du herrietako erronkak lurraldearenak ere badirela, eta gobernu kontseilua egin aurretik alkatearekin izandako hartu-emanean azaldutako eta konpartituak izan daitezkeen gaiei heltzeko prestutasuna adierazi du, zaintza eta kultura alorrekoak horiek. “Egiten ditugun bisita hauei balioa eman nahi diet, Gipuzkoan hain ezagun ez diren halako espazioen berri emateko aukera delako. Gonbidapenak dira herritarrei etorri hona esateko, herrietan ere sekulako egitasmoak daudelako. Lekuona Fabrikara egindako bisita gidatua zoragarria izan da, hortaz, eskerrik asko”. Lekuonako agerraldiaren ondoren herriko eragileekin izan da ahaldun nagusia, haien kezkak eta ekarpenak jasotzeko.
Lekuona ezagutu ondoren, kultur azpiegituraren kanpoaldean adierazpenak egin dituzte bi agintariek. Herrian egindakoak aipatzeaz aparte, bertan izan diren hedabideen aurrean bestelako zehaztasunak eman ditu Mendozak, gai nagusi AHTaren zundaketak izan direlarik.
Gipuzkoako Foru Aldundiko diputatuak, Aizpea Otaegi alkatearekin, Joxepa Antoni Aranberri gunearen atarian. Argazkia: Gipuzkoako Foru Aldundia.
