Etxez etxeko langileek manifestazioak egingo dituzte
Pasaiako zerbitzuko langileek 50 egun baino gehiago daramate greba mugagabean, eta beren egoera aldarrikatzeko, manifestatu egingo dira: bihar Antxon izango dira, eta etzi Donibanen.
Pasaiako Etxez Etxeko Laguntza Zerbitzuko langileek 50 egun baino gehiago daramate greba mugagabean. Hitzarmen berriaren negoziazioan hilabete batzuk pasa ondoren, enpresa negoziazio prozesua atzeratzen ari dela jakinarazi dute zerbitzua ematen duten langileek.
Aldi berean, Pasaiako Udalak eskaintzen duen zerbitzua publikoa izan ordez, kanpoko enpresa bati azpikontratatzen diola gogorarazi dute langileek, “lan eta bizi baldintzak prekarietatean mantenduz”.
Hori dela eta, publifikazioa gauzatzen den bitartean, udalari eskatu diote “langileen lan baldintzak udaleko langileen lan baldintzetara parekatzea”. Enpresari begirako eskaera bat ere badute: “Udalak parekatzerako ematen duen diru hori gure hitzarmenean jaso dezala”.
Aipatutako guztia aldarrikatzeko, Pasaiako etxez etxeko langileek hiru manifestazio egingo dituzte datozen egunetan. Gaur goizean Donibanen izan dira. Bihar (osteguna) Antxon mobilizatuko dira, 18:00etan. Azkenik, ostiralean Donibanen izango dira berriz, 11:00etan.
