Aktibatuz egitasmoak inplementazio faseari heldu dio
Diagnostiko fasea egin dute lehenbizi, eta inplementazio faseari ekin diote berriki. Kirol klubetan euskararen erabilera sustatzea da asmoa.
Orsoaldeko kirol klubetan euskararen erabilera sustatzeko egitasmoa da Aktibatuz, eta berriki diagnostiko fasea amaitu eta inplementazio faseari ekin diote. Alabaina, emaitzak ez dituzte publiko egingo abendua baino lehen.
Kirolari gazteekin hilaren 14an egin zuten lan saioa, eta tarte horretan kirolariek bizipenak eta iritziak jaso zituzten kirol klubetako bizipenak nolakoak diren aztertzeko. Hura, gainera, “diagnostikoa osatzeko eta euskararen egoera ulertzeko ekarpen baliotsua” izan zela diote.
Aipatutako prozesu honetan klubetako ordezkariak, udaletako teknikariak zein Soziolinguistika Klusterra elkarlanean ari dira EMUNekin, baina “klub bakoitzaren abiapuntua eta erritmoa” dituzte ardatz. Kontatu dutenez, askotariko bilerak egin dituzte, eta diagnostiko faseko lanek “harrera ona” izan dute teknikarien zein klubetako ordezkarien aldetik.
Diagnostikoaren fasea amaituta, inplementazio faseari heldu diote orain, eta fase horretan klub bakoitza bere ekintza plana osatzen hasiko da “euskararen erabilera areagotzeko eta esperientziak partekatzeko asmoz”.
Azkenik, nabarmendu dute klubek konpromiso komunak hartzea sustatuko dutela eta elkarlanean jarraitzeko borondatea berretsi dutela “euskarak kirol arloan duen lekua indartzen jarraitzeko”.
