Tunelaren bukaeran argia ikusten
Pasaiako Portu Agintaritzak, Gipuzkoako Foru Aldundiak eta Pasaiako Udalak Illunberentzat behin betiko konponbide bat lortzeko oinarriak ezarri dituztela adierazi du klubak.
Trintxerpe Illunbe Arraun Elkarteak eskerrak eman nahi dizkie Pasaiako Portu Agintaritzari (PPA), Gipuzkoako Foru Aldundiari eta Pasaiako Udalari klubaren jarduera epe laburrera eta epe ertain luzera begira behin betiko irtenbidea aurkitzeko prest egoteagatik. Klubak iraila hasieran iragarri zuen egoera kritikoan eta desagertzear zegoela. PPAk portuko instalazioetatik desalojatu zituen, eta irtenbide errealik gabe zeuden. Urgentziazko azken deia egin zuten laguntza eskatzeko eta beren jarduna ezerezean ez geratzeko. Ahalegin horrek fruituak eman ditu orain.
Aipatutako hiru erakundeak klubeko ordezkariekin bildu ziren atzo, eta Illunberentzat behin betiko konponbide bat lortzeko oinarriak ezarri direla jakinarazi du arraun elkarteak. Aldi berean, Trintxerpeko gizarte eta kultura jardueran kolaboratzaile aktibo izateko konpromisoa hartu du klubak.
Illunbek administrazio publikoen “prestasuna eta konpromisoa” aitortu nahi ditu: “Haien baterako lana funtsezkoa izango da helburua lortzeko, hau da, arraunaren inguruan lan egitea eta gizartea sortzea, balio handiko kirola baita”.
Klubarentzat ate bat irekitzen dela jakinda, jarduerarekin jarraituko dutela jakinarazi dute: “Gure jarduerarekin jarraituko dugu, ahal dugun neurrian, baina etorkizunean gure klubarentzat eta Trintxerperentzat behin betiko egoitza bat ikusteko ilusio handiarekin”.
Horrez gain, klubak eskerrak eman dizkie Beteranoen Ligako klub guztiei, arraun klubei, Adinberri Fundazioari eta Trintxerpeko kultur elkarteei.
