Landa eremurako energia berriztagarrien gaineko hitzaldi informatiboa asteazkenean
Zamalbide Bentak auzo elkartean izango da hitzaldia, diru laguntzak eta energia komunitateak ardatz.
Landa eremuan ere ezarri du udalak hondakinen gaikako bilketa. Errenteriako Udalak landa eremurako energia berriztagarrien gaineko hitzaldi informatiboa antolatu du, diru laguntzak eta energia komunitateak ardatz hartuta. Asteazkenean, hilaren 29an, izango da Zamalbide Bentak auzo elkartearen lokalean, 19:00etan, Oarsoaldeko Energia Bulegoko eta Ekiherri Energia berriztagarrien Komunitateko adituekin. Energia trantsizioa sustatzeko dauden tresnak eta laguntzak herritarrei gerturatu nahi dizkiete hitzaldiaren bidez, landa ingurunearen berezitasunetan arreta jarrita. Hala, bertaratzen direnek diru laguntzak eskatzeko moduaren gaineko zalantzak argitu ahal izango dituzte, baita tokiko energia komunitateen funtzionamendua eta abantailak ezagutu ere.
Jasangarritasunarekin eta klima aldaketaren kontrako lanketaren testuinguruan kokatu du udalak hitzaldia, energia eredu garbiagoa, deszentralizatuagoa, eta herritarren eskurago dagoena sustatzeko. Lehen sektoreari bultzada eman eta landa eremuko baldintzak hobetzea ere jarri du helburu udalak.
Informazio gehiagorako 943 34 41 60 telefono zenbakira dei daiteke.
