Berdintasun formazioa Lezoko elkarteentzat
Hilaren 30ean eta azaroaren 6an izango dira formazio saioak. Lezoko III. Berdintasun Planaren barruko jarduerak dira topaketak.
Lezoko Udalak berdintasunaren alorrena formazioa jasotzeko bi saio antolatu ditu herriko elkarteentzat. Hilaren 30ean eta azaroaren 6an izango dira (ostegunak dira) 18:00etatik 20:00etara. Lehena Kultura Aretoan egingo dute, bigarrena udaletxean. Lezoko III. Berdintasun Planean jasota dagoen jarduketa da formazio saioena. Han izan nahi dutenek aurrez izena eman behar dute, posta elektroniko mezu bat bidalita. Idoia Lekue adituak izango da saioen gidari.
“Lezoko elkarteak berdintasunaren inguruan sentsibilizatu, oinarrizko kontzeptuak barneratu, berdintasunarekiko duten ezagutza areagotu eta, hartara, euren jarduna errazteko formazio saioak antolatu ditu Berdintasun Sailak”, zehaztu du udalak. Hala, herriko elkarte guztiei gonbita egin die udal erakundeak saioetan parte har dezaten, “berdintasuna denon ardura izanik, egunerokoan zein antolatzen dituzten ekintzetan kontuan hartzeko tresnak eskuratu ahal izateko aukera izango baita”.
Udalak saio bakoitzeko edukiak jakinarazi ditu. Honakoak dira:
Lehen saioa (hilaren 30ean, 18:00etatik 20:00etara, Kultura Aretoan)
- Gizarte patriarkal eta androzentrikoa.
- Jarduera publikoaren neutraltasun falta.
- Aukera librearen mitoa.
- Lanbideen sexuaren araberako bereizketa: horizontala eta bertikala.
- Soldata arrakala.
- Diskriminazio zuzena, zeharkakoa, anitza eta islatua.
- Sexu-genero sistema bitarra.
Bigarren saioa (azaroaren 6an, 18:00etatik 20:00etara, udaletxean)
- Zer da genero-ikuspegia txertatzea?
- Ekintza positiboa.
- Mainstreaming eta zeharkakotasuna.
- Genero egokitasuna detektatuz.
- Genero-ikuspegia proiektuetan txertatzen.
