Xanti Esnaolak badu jada bere saria
Antxotarraren 'Laurak Bat dira' irudiak irabazi du Laurak Batek eta udalak antolatzen duten argazki lehiaketa. Irabazleak 500 euroko erosketa txartela bat jaso du, Laurak Bateko dendetan gastatzeko.
Iraila hasieran Laurak Bat Merkataritza, Ostalaritza eta Zerbitzuen Elkarteak eta Pasaiako Udalak argazki lehiaketa bat antolatu zuten 2026ko udal egutegiaren azala aukeratzeko. Irabazlea Xanti Esnaola antxotarraren Laurak Bat dira izeneko argazkia izan da, eta irudi hori izango da datorren urteko udal egutegiaren azala. Mikel Garcia Antxoko alkateordeak eta Mari Carmen Mogilnicki Laurak Bateko presidenteak 500 euroko erosketa txartela bat eman diote lehiaketaren irabazleari, Laurak Bateko establezimenduetan gastatzeko.
“Argazki asko eta maila handikoak jaso genituen, baina epaimahaiak Pasaiako lau barrutietako eguneroko bizitza islatzen duen argazki baten alde egin zuen”, adierazi du Garciak. Epaimahaia Laurak Bateko zuzendaritza batzordeko kideek eta udal teknikariek osatu dute. Sustatzaileek nabarmendu dute lehiaketa erabat anonimoa zela argazki irabazlea aukeratu arte.
Bestalde, honakoa adierazi du Mogilnickik lehiaketaren inguruan: “Lehenik eta behin, eskerrak eman nahi dizkiogu udalari lehiaketa hau aurrera eramateko aukera emateagatik. Oso egitasmo polita da, egutegia pasaitarren etxe eta bulegoetan egongo baita. Pozik gaude irabazlea pasaitarra delako, nahiz eta lehiaketa herritar guztientzat irekita egon. Laurak Batetik lau barrutietako bizitza sustatzen dugu beti eta argazki irabazleak ezin hobeto erakusten du hori”.
Esnaola pozik da argazki lehiaketa bere egin duelako: “Argazki batzuk aurkeztu nituen, guztiak Pasaiako toki bereizgarrietako muntaiak ziren. Zortea izan nuen, lehiaketa hau antolatu zela jakin bezain laster, nire kamera hartu eta Pasaiako lau barrutietan barrena joan nintzelako, eta sekulako eguraldia egin zidan. Oso pozik nago sari hau jasotzeagatik, oso 2025 positiboa izaten ari da niretzat, besteak beste, aitona izango naizelako eta oso gauza politak gertatzen ari zaizkidalako. Sari honek bukaera bikaina ematen dio urteari”.
Esnaolak aitortu du jada hainbat gauza “fitxatuta” dauzkala Laurak Bateko dendetan: “Oraintxe bertan hainbat gauza erosiko ditut. Saria familia osoarekin partekatuko dut”. Saria emateko ekitaldian alabetako bat eta emaztea harekin izan dira.
Garciak aurreratu du dagoeneko prestatzen ari direla 2026ko udal egutegia. Urte bukaeran pasaitar guztiek erosi ahal izango dute.
