'San Juan' baleontzia uretan da, itsasoari begira
Pasaiako badia une historiko eta magiko baten agertoki izan da gaur. XVI. mendeko 'San Juan' baleontziaren erreplika uretaratu dute, hamar urte luzeko proiektu mugarriak ur hartu du gaur.
Iritsi da egun eta une handia. Hamarkada bateko ibilbidearen ondoren, uretan da jada San Juan baleontzia. Gaur arratsaldean Albaola Itsas Kultur Faktoriatik irten eta Pasaiako badian porturatu dute ontzi ikusgarri eta ederra. Zientoka eta zientoka herritarrek San Pedron zein Donibaneko pasealekuak bete dituzte, une historiko honen testigu izateko.
XVI. mendean Pasaian eraikitako San Juan baleontziaren erreplika zehatz da gaur uretaratu dutena. Garai hartan Euskal Herritik Ternuara joaten ziren ontzi transozeanikoen adibideetako bat da. 1565ean, Red Bay-n, Kanadako Ipar Atlantiar kostaldean hondoratu zen Pasaiako ontzi hura. 1978an Red Bay herritik gertu aurkitu zuten eta duela hamar urte hasi ziren baleontzi horren erreplika egiten San Pedroko faktorian, orain dela 500 urte erabiltzen zituzten material eta teknikak baliatuta.
Botaduraren aurretik ekitaldi instituzional itxia egin dute Albaolako kideek eta erakundeetako ordezkariek, tartean, Xabier Agote Albaolako presidentea, Imanol Pradales lehendakaria, Eider Mendoza Gipuzkoako diputatu nagusia eta Espainiako eta Kanadako gobernuetako ordezkariak izan dira, proiektuan parte hartu duten hainbat diziplinetako kolaboratzaileekin batera. Jakinmin handia piztu du gaurko ekitaldiak. Historikoa, mugarria. Hamaika bider errepikatutako hitzak izan dira gaur.
Ontzi honen helburu nagusia Kanadara abiatzea bada ere, Pasaian denbora batez izango da, herritarrek kanpotik zein barrutik ikus dezaten. Oraindik datarik eman ez badute ere, hurrengo pausoa XVI. mendeko bidaia horiek erreplikatzea izango da. Ternuarako bidea hartuko du berriro Pasaiako baleontzi batek, 500 urteren ondoren.
HITZAk ez du gaurko egun handia galdu nahi izan, eta zenbait irudi biltzen izan da bertan. Hona hauekin osatutako bideoa:
