Urdabururen eguna gertu dago
Azaroaren 30ean egingo dute, eta hiru txango prestatu dituzte. Ondoren, denak Tolaren elkartuko dira bazkaltzeko.
Urdabururen eguna egingo dute beste urte batez azaroaren 30ean Urdaburu Mendizale Elkarteko kideek. Mendi martxa bat egingo dute, eta ondoren, denak elkartu egingo dira elkarrekin bazkaltzeko. Tolaren izango da bazkaria. Hiru ibilbide prestatu dituzte:
- Helduen txangoa : Ergoienen hasiko dira, eta handik Xorrolara, Oianlekura, Harritxurietara joango dira, eta azkenik Ergoienera itzuli. 15 kilometroko ibilaldia da, eta 800 metroko desnibela izango dute. Irteera ordua 08:00etan da, Zumardian. Autobusean aldatzeko arropa utzi ahal izango da. Izena emateko, klikatu hemen.
- Gurasoen txangoa: Ibilbidea, Sorondo-Urdaburu-Listorreta izango da, eta irteera ordua 08:00ak, Niesseneko autobus geltokian. Eskolartekoen sailan ibiltzen diren haurren gurasoentzat da txangoa. Eskolartekoen ibilbide eta ordutegi berdinak izango ditu. Egin ohi den bezala, eskolartekoak aurretik joango dira begirale taldearekin, eta gurasoak atzerago. Tontorrean elkartuko dira eta jaitsiera elkarrekin egingo dute. Eskolartekoek ohiko moduan izena emango dute Orereta Ikastolan, azaroak 12tik aurrera, eta bertan adierazi beharko dute bazkaltzen gelditzen diren edo ez. Izena emateko, klikatu hemen.
- Txikien txangoa: Ibilbidea, Susperregi-Urdaburu-Susperregi izango da; (Urdaburu tontorrean edo bidean ikastolakoekin elkartuko dira eta ondoren denak batera jaitsiko dira Susperregira). Txango hau eskolartekoekin ibiltzen ez diren haurrentzat dago bideratua baina edozein haurrek parte har dezake, beti ere heldu baten ardurapean. Irteera ordua 9:00etan Susperregin izango da. Izena emateko, klikatu hemen.
Tolaren bi aukera izango dituzte bertaratutakoek. Helduentzat Larraundi menua prestatuko dute: Urdaiazpiko iberikoa, zainzuriak maionesarekin, bakailaoz beteriko piperrak pikillo saltsarekin, ganba eta baratxuri fresko nahaskia, txahal koxkorra gisatua barazki saltsan eta moka tarta marrubi pure finaren gainean eta izozkia. Larraundi menuaren prezioa 20 eurokoa izango da, edaria eta kafea barne. Umeen menua 8 eurokoa izango da: pasta, oilasko bularrak, izozkia, ura, freskagarria eta ogia.
Informazio gehiago lortzeko, deitu 943527879 telefonora.
