"Antolatzea eta autodefentsa feministari ekitea besterik ez zaigu geratzen"
Lezoarrak ere kalera atera ziren atzoko Indarkeria Matxistaren Kontrako Egunean. Musika, dantza, antzerki eta performance batekin biribildu zuten aldarrikapen eguna.
Indarkeria Matxistaren Kontrako Eguna izan zen atzokoa, eta urtero bezala, kaleak hartu zituzten herritarrek. Lezon ere hala izan zen, eta arratsaldean Saldise plaza jendez eta aldarriz bete zuten. Ekitaldi berezia izan zen atzokoa. Lehenik, Iruntzen Lezoko Emakume Taldeko kide batek hitza hartu zuen. Jarraian, Orratx antzerki taldeko batek mezu eta aldarrizkapenez jositako emanaldi eskaini zien bertaratutakoei. Dantza eta musika ere izan ziren atzokoan. Eta A25eko mobilizazioa biribiltzeko, plazan bertan kokatutako pankarta bat begizta gorriz bete zuten lezoarrek.
“Herriko festak, eraso bat, erantzun bat eta kontran datozen oihuak. Bortxaketa bat, salaketa bat, sinesten ez gaituen justizia sistema bat eta maorrua. Erailketa matxista bat, polizien zalantza, instituzioen hitz hutsak. Arrazakeria feminismoz justifikatuta. Eskuin muturra eta jarrera erreakzionarioak, transfobia eta antifeminismoa”, hitz hauekin abiatu zuten atzokoa. Zerrendatutako ideia hauek “nahasiak” badirudite ere, “egungo sistema kapitalista zisheteropatriarkal arrazista eta kolonialista sostengatzen duten egituren piezak” direla esan zuten, ozen. Azken hiletan, gainera, feminismoaren eta feministen kontrako diskurtsoak eta praktikak kaleetan “inpunitate osoz” ikusi direla aipatu zuten, baita sare nahiz komunikabideetan.
Horren adibide gisa pasa den udan zenbait herritan bizitakoa jarri dute: “eraso matxistak salatzeko ekintzetan, Mugimendu Feministak oldarraldi erreakzionario horren erantzuna jaso zuen bueltan: txistuak, oihuak, egindako lana etengabe auzitan jartzea… Feminismoaren deslegitimazio argia”.
Guzti hau ez dela ausaz gertatzen erantsi zuten, aipatutako egitura horien “ondorioz” baizik. “Sarri esan ohi dugu feministok ematen dugun urrats bakoitzeko etsaia oldartu egiten dela, bada, oraingoan ere hala izaten ari da. Eskuin muturrak eta posizio erreakzionarioek diskurtso faxistak elikatzen dituzte, eta antifeminismoa, arrazakeria edo transfobia indartzen dute, gorrotozko diskurtsoak eta eraso zuzenak eraginez”.
Instituzioek ez dutela indarkeria matxista nahiz arrazista lehen mailako arazo politikotzat jotzen salatu zuten, gogor: “gizonen arteko anaitasuna, gorputzen burujabetzaren kontrako diskurtsoa darabiltenak, feminista ez den justizia sistema ez dira kontu isolatuak. Horien guztien arteko aliantzan betikotzen dira zapaltzen gaituzten egiturak”. Erakundeek indarkeriaren “ulerkera murritza” dutela ere salatu zuten, eta ez dagoela inolako justizia feministarik. Horrek “gizonek euren konplizitate sareak eraikitzen jarraitzea eta feminismoari zilegitasuna kentzea” ahalbidetu duela deitoratu zuten.
Indarkeria betikotzeko egiturek topatzen dituzten zirrikitu eta mekanismoei aurre egiteko beharra nabarmendu zuten: “azken urte luzetan Euskal Herriko hamaika txokotan egin bezala, antolatzea besterik ez zaigu geratzen. Antolatzea eta autodefentsa feministari ekitea. Kalean, etxean, lantokian, jaietako egitarauetan, eszenatokietan, asanbladetan. Hamaika tresna martxan ditugu jada, eta beste hamaika prestatzen ari gara. Ez garelako menpeko harremanek sortzen dituzten askotariko indarkeriekin amaitu arte geldituko. Ardurak hartzen jarraituko dugu,baina, batez ere, ardurak hartzea exijitzen”. Tinko borrokan jarraitzeko asmoa adierazi zuten atzo Lezoko emakumeek, “feminismoaren alde, arrazakeriaren kontra, Justizia Feministaren alde, erasoen kontra, borrokarako sare eta aliantzen alde, anaidien kontra, egiturak apurtzearen alde, zapaltzen gaituzten egituren kontra. Ez dago erdibiderik, lerratu”.
Jarraian atzoko mobilizazioan HITZAk aterarako irudiak:
