Antzerki fisiko laborategia egingo dute abendutik urtarrilera
Xabi 'Jabato' Lopez ariko da laborategien zuzendaritzan. Aurtengoan Maddalen Dorronsoro eta Lander Garro dira gonbidatuak.
Xabi 'Jabato' Lopez, Instagrameko irudi batean. @asiercorera Dagoeneko ohitura den modura, aurten ere Oiartzungo Antzerki Laborategiak egingo dituzte Eguberrietako oporren inguruan.
Edizio berri hau Nola narratu kantutik lelopean antolatu dute, eta, antzerki fisikoa oinarri izanik, “gure bidaiak; kantuak, polifoniak, gorputza, dramaturgia eta sorkuntza” izango dira ikerketarako erabiliko dituzten elementu nagusiak.
Gauzak horrela, aurtengoan Maddalen Dorronsoro koru zuzendaria eta ahots teknikan zein kantuan aditua eta Lander Garro idazle eta zinematografoa izango dira gonbidatuak. Laborategien zuzendaritza lanez, baina, Xabi Jabato Lopez arduratuko da.
Ikastaroak zazpi eguneko iraupena izango du (35 ordu, zehazki), eta 180 euro balio du. Izena emateko edota edozein zalantza argitzeko, helbide elektroniko hau eta 647 91 55 92 telefono zenbakia luzatu dituzte.
Ikastaroa emango duten egunak honakoak izango dira: abenduak 27, 28, 29, 30 eta urtarrilaren 3, 4 eta 5a.
