Udal foroa egin dute ikasleekin Oiartzungo udaletxean
Udal ordezkariak eta ikastetxeetako ikasleen ordezkariak elkartu ziren atzo, eta burututako zein etorkizunean egingo dituzten jarduerak azaldu zituzten.
Atzo goizean 2025-26 ikasturteko Eskolako Agenda 2030 programaren hasierako udal foroa egin zuten Oiartzungo udaletxean, eta horretarako udal ordezkariak eta ikastetxeetako ikasleen ordezkariak elkartu ziren.
Ekitaldi horretan ikasleek aurreko ikasturtean landutako 6. Garapen Jasangarrirako Helburuaren diagnostikoaren emaitzak aurkezteaz gain, aurten burutuko dituzten ekintzen berri eman zuten.
Agerraldiak aurreratu zutenez, 2025-26 ikasturtean zehar bi ekintza garatuko dituzte ikasleek. Horietako bat izango da erreka garbitzeko egingo dituzten irteerak, eta, bestea, berriz, ikasleek herria eta ikastetxeak garbi mantentzeko komunikazio kanpaina bideratuko dutela “hondakinak errekara iritsi ez daitezen”.
Zehaztu dutenez, foro horrek udalaren funtzionamendua eta erabakiak hartzeko modua ezagutzeko aukera eskaini zuen.
Hitzorduan, azkenik, Nor da? eta Egia ala gezurra izeneko dinamikak egin zituzten bilera “modu aktiboan” egiteko.
Diotenez, bileraren helburu nagusia “ikasleen ahotsa entzun eta udalerria jasangarriagoa bihurtzeko bidea elkarrekin egitea” izan zen.
