'Lotura basatiak' eta 'Bo jauna' antzezlanak, Landetxen
Oiartzungo Antzerkizale Elkarteak antolatu ditu bi saioak, eta hilaren 14an zein 28an izango dira, hurrenez hurren.
Oiartzungo Antzerkizale Elkarteak udalaren laguntzarekin Lotura basatiak emanaldia antolatu du. Goaz Taldearen lana da berau, eta Vivian Gornick idazlearen izen bereko liburuan oinarrituta dago. Saioa hilaren 14an izango da (igandea da), 19:00etan.
Emanaldia ama eta alaba arteko harremanari buruzko obra bat da, eta hitza, irudia, musika eta mugimendua nahasten ditu bere horretan.
Alabaina, honakoa da lanaren sinopsia: Zilbor-heste bat. Ama eta alaba hariaren punta bakoitzean, hariari so. Lotura kate bat. Ama eta alaba hariaren punta banatik heldu eta hari tiraka, dantza geldiezin batean, harremanari korapiloak egin eta askatu, betirako iraungo duen doinu batean balantzaka. Beldurra, kontrola, dependentzia, zama, maitasuna. Etengo den edo etengo ez den dantza infinitu bat.
Emanaldi horretarako sarrerak salgai daude dagoeneko, eta hemen eros daitezke.
Antzezlan horretaz gain, Antzerkizale taldeak jakinarazi du hilaren 28an haurrentzako Bo jauna emanaldia ere antolatu dutela. Saio horretako sarrerak ere eros daitezke dagoeneko.
