Udal gobernua "oso harro" hitzarmen berriarekin
Pasaiako etxez etxeko langileek hitzarmen kolektibo berria lortu dute, eta udal gobernuak baikor baloratu du sinatu den hitzarmen berria.
Pasaiako etxez etxeko langileek hitzarmen kolektibo berria lortu dute. Hilabete askoko borrokaldia izan da langileentzat eta 108 egun eman dituzte greba mugagabean. Pasaiako udal gobernuak “oso harro eta positiboki” baloratu du sinatu den hitzarmen berria.
Udal gobernuak adierazi du prozesua “luzea eta maldatsua” izan dela, baina lan baldintzen hobekuntzak bermatzen dituen akordio “sendoa” lortu dutela: “%30eko soldata igoera, atseden egun gehiago, 25 orduko gutxieneko lanaldia eta bestelako eskubide eta plusen eguneraketa”. Langileentzako formakuntza espezifikorako eta euskara gaitasunean sakontzeko bermeak ere jaso direla jakinarazi du udalak.
“Ez da izan bide erraza”, esan du udalak. Langileek 108 greba egun bete dituzte, bilerak eta telefono deiak egin dituzte, aukera eta eredu ezberdinen etengabeko azterketak bilatu dituzte, eta urtebete baino gehiago pasa dute akordioaren bila. Pasaiako udal gobernuak honakoa berretsi nahi du: “Langileen eskubideen aldeko borroka legitimo honek bultzatu du benetako aldaketa. Zaintza lanak urte luzez ikusezin bihurtu dituen sistemari aurre egin dio kolektibo honek, eta gaurko lorpena euren irmotasun eta antolakuntzaren fruitua da”.
Etxez etxeko laguntza zerbitzua “sektore feminizatua” dela, “bereziki prekarioa” dela, eta esparru horretan dauden “diskriminazio estrukturalak agerian geratu” direla nabarmendu du udal gobernuak. Udal gobernuari, ikuspegi feministatik eta politika publikoen eraldaketatik, “erabakigarria” iruditzen zaio lorpena. “Zaintza ez da bigarren mailakoa: eskubidea da, eta herritarrei arreta duina bermatzea ezinbestekoa den bezala, zaintza ematen dutenen lan baldintzek ere duintasun osoa merezi dute”, esan dute.
Bide horretan, udal gobernuak adierazi du akordiora iristeko “jarrera erabakigarria” izan duela: “Gure lehentasuna izan da hobekuntza horiek guztiak bermatuko zituzten baldintza agiri berriak diseinatzea, orain artekoekin alderatuta, baldintza eta hobekuntza nabariak sartuta”.
Gaur egun, enpresa pribatu batek kudeatzen du etxez etxeko laguntza zerbitzua, eta udal gobernuak jakinarazi du “publifikazioaren ereduen azterketa” eskatu dutela: “Epe ertainera Pasaiako Udalak publifikazio horren alde egiteko dituen aukerak zuhur aztertu eta partekatuko ditugu”.
“Akordio hau ez da bukaera, baizik eta abiapuntu sendo bat”, esan du udal gobernuak. Aurrerantzean, honako konpromisoak hartu ditu udalak:
- Zerbitzu Jarraipen Batzordea martxan jartzea, gardentasuna eta zerbitzuaren kalitate hobea bermatzeko.
- Euskararen erabileraren eta zaintza ereduaren inguruko formakuntza espezializatua indartzea.
- Erabiltzaileentzako ordu kopurua handitzea, zaintza duin eta eraginkorragoa bermatzeko.
- Lanaldi egonkorragoak eta erreferente bakarraren eredua sustatzea, kalitatezko zaintza harremanak eraikitzeko.
- Zerbitzuaren publifikazio ereduen bideragarritasun teknikoa aztertzea, etorkizuneko zaintza eredu publiko eta egonkor baterako oinarriak eraikitzeko.
- Eta, orokorrean, zaintzan inbertsio publiko handiagoa egitea, dagoeneko 2026ko aurrekontuetan jasota dagoen bezala.
“Gaurko akordioa langileek irabazi dute, baina herriak ere irabazi du: zainduak direnek, zaintzaileek, eta Pasaiako komunitateak oro har. Zaintza duinak bermatuko dituen herria nahi dugulako. Eta, bide horretan, udal gobernu hau aliatu izaten jarraituko dute”, esan du udal gobernuak.
