Mendizale bat hilda aurkitu dute Aiako Harrian
Segurtasun Sailak jakitera eman duenez, 54 urteko gizon baten hilotza da Aiako Harrian aurkitu dutena. Atzo gauean eman zuten desagerpenaren berri.
Aiako Harria Parke Naturala Segurtasun Sailak berriki jakinarazi du Iban Apaolaza 54 urteko oiartzuarra hilda aurkitu dutela Aiako Harrian. Zabaldutako informazioaren arabera, Aiako Harritik ibilbide bat egitera joan zen atzo (hilak 4, igandea), eta ez zen itzuli. Atzo gaueko hamarrak aldera eman zuen familiak desagerpenaren berri. Beasainen jaioa, azken urteetan Oiartzunen bizi izandakoa zen.
Gauerdia baino zertxobait lehenago bilaketa dispositibo bat ezarri zuten, eta Errenteriako Ertzain Etxeko errekurtsoek, Ertzaintzaren Zaintza eta Erreskate Unitateko helikopteroak, suhiltzaileek, Oiartzungo udaltzainek eta Gurutze Gorriak hartu dute parte bilaketa prozesuan. Bilaketa lanen ondoren, mendizalearen gorpua gaur goizeko hamarrak aldera aurkitu dute.
Soziologian eta Antropologian lizentziatua zen Apaolaza, eta Ingeles ikasketetan ikasle eta Soziologian doktoregaia zen. Graduondokoa zuen Idazle Eskolan ere. Hain zuzen ere, idatzizko hainbat lan eman zituen argitara, ipuinak batez ere. Muga astoa eta haren ingurukoen kalamatrikak kaleratu zuen 2023an, gerraostean oiartzuarrek arto irina lortzeko inguruko herrietara egiten zituzten bidaietan oinarritutako narrazioa. Preso zela komiki bat ere argitaratu zuen: Hablando con (la) lluvia du izena. Espetxeetako lehiaketa baterako egindako komikia da, eta lehen saria jaso zuen. Izan ere, euskal presoa zen Apaolaza. 2007ko ekainean atxilotu zuten, Quebecen. 2008an Espainiaren esku utzi zuten, eta ETAko kide izatea egotzita epaitu; 123 urteko zigorra ezarri zioten. Hirugarren graduan zegoen iaztik. Ez zen EPPK-ko kidea.
Apaolaza BERRIAko dokumentazio arduraduna zen. “Egunkariko edukiak eta argitalpenak artxibatu, katalogatu eta dokumentatzeaz arduratzen zen. Itzaleko lana egiten zuen erabat, baina ezinbestekoa”, adierazi dute BERRIAko kideek. BERRIAn hasi aurretik beste hainbat komunikabidetan ere jardun zuen kolaboratzaile gisara. Oiartzun Irratian, besteak beste, Literhari irratsaioan.
