'Ez gaitzatela atzera eraman. Konponbidean aurrera' lelopean, elkarretaratzea
Auzitegi Gorenak Zulueta eta Enparantza abokatuen aurkako zigorrak berretsi eta Zuriarrain eta Sarriegirenak murriztu ditu. Babesa erakuste aldera, elkarretaratzea egingo dute gaur Oiartzunen.
2022an egin zuten elkarretaratzeko irudia . Espainiako Auzitegi Gorenak 13/13 auziarekin lotutako Arantza Zulueta eta Jon Enparantzari jarritako zigorrak berretsi ditu. Zigor horiek Espainiako Auzitegi Nazionalak 2022an jarri zituen, eta, gauzak horrela, Auzitegi Gorenak ontzat jo du epai hura berriki. Zuluetak zazpi urte eta erdiko zigorra jaso zuen; Enparantzak, haatik, lau urtekoa.
Era berean, baina, Naia Zuriarrain eta Iker Sarriegi zigortu zituzten. Zuriarraini hiru urte eta sei hilabeteko zigorra jarri zioten, eta Sarriegiri, berriz, hiru urte eta egun batekoa. Zulueta eta Enparantzaren kasuan ez bezala, honetan Auzitegi Gorenak zigorrak arindu ditu: Zuriarraini bi urtera jaitsi dio zigorra, eta bi urteko inhabilitazioa ezarri dio kargu publiko baterako. Sarriegiri, berriz, urtebete eta sei hilabetera jaitsi dio zigorra, eta bi urteko inhabilitazioa ezarri dio kargu publikoan.
Atzo bertan ezagututako epaiaren aurrean desadostasuna erakutsi du Sarek, eta salatu epai hori abokatu horiek ETAko kide izateagatik edo kolaborazioagatik zigortutako pertsonen defentsan egindako lanaren “intromisio argia” dela.
Horren aurrean, elkarretaratzea deitu dute gaur (hilak 8) arratsalderako Oiartzungo plazan Ez gaitzatela atzera eraman. Konponbidean, aurrera lelopean. 18:30ean bilduko dira.
