Hausnarketa kritikora espazio bilakatuko da berriro Emakumeen Etxea
Emakumeen Etxeko programazio taldeak, eta hitzaldia, bilduma aurkezpena eta dokuforuma antolatu ditu.
Urte berriarekin batera ekingo dio programazioari Emakumeen Etxeak. Oraingoan ere eskaintza interesgarria ondu du Emakumeen Etxeko programazio taldeak, eta hitzaldia, bilduma aurkezpena eta dokuforuma antolatu ditu. Hala, filosofiaren historiako emakumeei, Errenteria-Oreretako emakume erreferenteei eta diktadura betean Marta operazioaren barruan Australiara eraman zituzten emakumeei buruzko hausnarketa batekin emango dio hasiera urteari.
Lehenengo jarduera Zergatik ez da egon emakume filosoforik? edo aurrekariaren garrantzia hitzaldia izango da, hilaren 15ean, osteguna, 18:00etan.
Emakumeen Etxeko programazio-lantaldeak antolatutako hitzaldi honetan, Marisa Hurtado dibulgatzaile eta filosofian adituak historian zehar isildutako emakume pentsalarien pentsamendura hurbilketa laburra egingo du, filosofiaren hastapenetatik emakume pentsalariak egon direla berretsiz, bai eta emakumeen historia berreskuratzeko aurrekariaren eta genealogiaren garrantzia ere.
Bigarren jarduera, Berdintasun Kontseiluak antolatuta, hilaren 17an, larunbatean izango da, 12:00etan, Errenteriako Emakumeen Aztarnak: Narrazioak II bilduma ilustratuaren aurkezpenarekin.
2018an, Mariasun Landa Sarien lehen zortzi edizioetan jasotako 23 lanekin Errenteriako emakumeen aztarnak: narrazioak I bilduma ilustratua argitaratu zen. Orain, bigarren bilduma bat argitaratzea erabaki da, geroztik jasotako hainbat lanekin. Kasu honetan ere, Allende Arnaizek eta Idoia Beratarbidek diseinatu dute bilduma, azken honen ilustrazioekin batera.
Hileko programazioa itxiko duen jarduera El avión de las novias dokuforuma izango da, hilaren 22an, osteguna, 18:00etatik 20:00etara. Emakumeen Etxeko programazio lantaldeak antolatuta.
Marta operazioa ezagutzeko denboran zeharreko bidaia da dokumental hori: 1959tik 1964ra, Australiako Eliza Katolikoaren eta erregimen frankistaren arteko migrazio akordio horrek 700 emakume etxeko langile gisa eraman zituen herrialde hartara, bizitza hobe baten promesarekin. “Martak” etxeko langile gisa bi urterako lan egiteko kontratuarekin iristen baziren ere, planaren benetako asmoa beren herrikideekin ezkontzea zen, lehenago Kanguro, Eukalipto eta Emu operazioetan emigratu zutenak, alegia.
Dokumentalaren emanaldiaren ondoren solasaldirako tartea izango da.
Informazio gehiago nahi izanez gero Emakumeen Etxean bertan (Txirrita Parkea, z.g), emailez (klik hemen) idatziz edo telefonoz (943 449 630) jasotzeko aukera egongo da, astelehen eta ostiraletan 9:00etatik 13:00etara eta astearte, asteazken eta ostegunetan 16:00etatik 20:00etara.
