Mendiko bizikletan trebatzeko OTXEren topaketa Lezon

Hilaren 25ean izango da Oarsoaldeko Txirrindularitza Eskolak proposatutako topaketa. 2011 eta 2015 urteen artean jaiotakoentzat da.

Iazko topaketako artxiboko irudia.OTXE

Oarsoaldeko Txirrindularitza Eskolak (OTXE) mendiko bizikletan trebatzeko Lezo BTT Gaztea topagunea antolatu du aurten berriz ere Lezon hilaren 25erako (igandea). 2011 eta 2015 urteen artean jaiotakoentzat (bi urte horiek barne) kirol eta ikasketa jarduera izango da urtarrileko azken igandean egingo den hori. “Jardueraren helburu nagusiak dira bizikletaren erabilera sustatzea Lezon eta eskualdean, eta Jaizkibelen mendi bizikletaren ibilbideak ezagutzea gazteen artean”. 10:00etan ekingo diote saioari, Karlos Saldise plazan.

Mendiko bizikleten gaineko oinarrizko informazioa jasotzeaz gainera, bi ibilbideren artean aukeratu eta horietako bat egiteko aukera izango dute izena ematen dutenek. Lehen ibilbidea luzea da, 21 kilometrokoa: Lezotik Hondarribiko Guadalupera joan, eta bueltakoa egingo dute. Bigarrena motzagoa da, 11 kilometrokoa: Karlos Saldisetik Iriarteneraino joan, eta itzuli. Bi martxak 12:00etan dira iristekoak abiapuntu izan den plazara.

Izen emateak
Saioan parte hartzeko izen ematea hilaren 25ean bertan egin behar da, Karlos Saldisen, 09:00etatik 09:45era. Doan da. Gainera, ahaleginaren ondoren indarberritzeko hamaiketakoa banatuko dela iragarri dute OTXEko kideek.

Ibilbideak JRG Norclamp OTXE mendiko bizikleta taldeko txirrindularien laguntzarekin, eta OTXEko begiraleen gidaritzapean egingo dituzte partaideek. Hori bai: mendiko bizikletaz gainera, kaskoa eta matxurarik balitz ordezko materiala (gurpil kamera bat, bonba eta lanabesak) eraman behar dituzte derrigorrean izena emango dutenek. “Saioa aukera bikaina da gazteek kirola egiteaz gain, naturaz eta inguruneaz gozatzeko”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.