Hiru etxegabetzeren kontra protesta egin dute, eta horiek bertan behera uzteko exijitu
Stop Kaleratzeak plataformak agerraldi jendetsua egin du gaur goizean Donostiako Bulebarrean; etxegabetze demanda jaso duten familietako bi Errenteria-Oreretakoak dira.
Donostian egin dute etxegabetzeak salatzeko elkarretaratzea gaur goizean. Hiru familiek etxegabetze demanda jaso dute, alokairu kontratuak bukatzeagatik ezohiko luzapena eskatua bazuten ere. Horietako bi, Errenteria-Oreretakoak dira, eta bestea, Donostiako. Stop Kaleratzeak plataformak agerraldi eta elkarretaratze jendetsua egin du gaur goizean egoeraren berri eman, salatu, eta kaleratzeak bertan behera utz ditzaten exijitzeko.
Eskerrak eman ditu lehenik eta behin plataformak, elkarretaratzera bildutako norbanako zein erakundeetako ordezkariei, baita Etxebizitza Legea eta horrek barnebiltzen dituen neurriak babestu dituztenei ere.
Etxebizitza Legeari aipamena egin dio berriro plataformak agerian jartzeko horrek eragina duela BOE Espainiako Estatuko Aldizkari Ofizialean argitaratu zen egunean indarrean zeuden alokairu kontratu guztientzat, data hori baino lehen sinatu diren edo ez kontuan hartu gabe, “horrela aitortzen du Eusko Jaurlaritzak bere web orrian”. Garrantzi handia du horrek plataformarentzat, aurten Araba, Bizkai eta Gipuzkoan 25.695 alokairu kontratu bukatuko direla aurreikusten baita, “luzapenari atxiki dakizkie kontratu horiek. Neurri horrek milaka etxegabetze demanda jartzea eragotz dezake, Espainiako Diputatuen Kongresuan baliozkotzeke dagoen 16/2025 dekretuaren onartzearekin batera”. Azken horrek aurtengo abenduaren 31 arte etxegabetzeak etetea suposatuko du bizitoki alternatibarik ez duten maizter kalteberen kasuan.
Sentsibilizazioa izan dute helburu gaurko agerraldiaren bidez, kaltetutako familiei babesa eta elkartasuna adieraztearekin batera, “jendartea sentsibilizatu nahi dugu, eta batez ere epaitegiak ezohiko luzapen horiek egiaztatzeko unean. izan ere, bizitegi krisiaren ondorioz ezin da etxebizitza bat eskuratu, ordainezinak direlako alokairuak”.
Datu gehiago ere eman ditu plataformak, eta hala, bi direla Araba, Bizkai eta Gipuzkoan etxegabetzeen arrazoiak adierazi du: alokairuen prezio altuak, eta kontratuak ez berritzea.
Edukitzaile, banku, funts putre, higiezinen jabe handien eta errentari txikien jarrera ere salatu du enegarrenez Stop kaleratzeak plataformak, “Etxebizitza Legea oztopatzen dutelako, baita hortik eratorritako neurriak ere”. Carmen, Jaime eta Grace eta Sthefanena dira etxegabetu nahi dituzten familiak; lehenengo biak dira errenteriarrak, eta Donostiarra hirugarren familia. Gaurko elkarretaratzean horien kaleratzea eragoztera deitu dute, “etxebizitza eskubidea delako, ez negozioa”.
