Musika eta Ahotsaren Etxearen lanak, lizitaziora
Altzaten eraikiko dute Musika eta Ahotsaren Etxea. Udalak 4.800.000 euro bideratuko ditu proiektu horretara.
Altzate auzo berrian eraikiko dute Ahotsaren Etxea. Herri Bizia Errenteriako Udalak Altzate auzoan eraikiko den Musikaren eta Ahotsaren Etxearen obren lizitazioa ireki du. Ekipamendu berri honek herriko musikaren eta ahots-musikaren alorreko eragileekin batera diseinatutako espazioak jasoko ditu, eta herrian ahotsaren eta musikaren esparruan jauzi kualitatiboa ekarriko duela jarri du nabarmen udalak.
Obrak egiteko interesa duten enpresek euren proposamenak otsailaren 4a baino lehen aurkeztu beharko dituzte. Ebazpena martxoan edo apirilerako espero da eta, kontratua sinatuta, lanak 18 hilabeteko epean gauzatzea aurreikusten da. Udalak 4.800.000 euro inguru bideratuko ditu proiektu honetara. Lanak ongi bidean, 2027ko ekainerako amaituta egotea espero da.
Musikaren eta Ahotsaren Etxea proiektu partekatua da. Udalak herriko eragileekin partaidetza prozesua jarri zuen abian ekipamendu berriaren diseinua kolektiboki egiteko. Musika Banda, Karnaba Otxotea eta hiru abesbatzak —Andra Mari, Landarbaso eta Zaria— parte hartu zuten prozesuan, ahotsaren eta musikaren esparruan profesionalki jarduten duten beste zenbait pertsonarekin eta udal arduradun politiko eta teknikoekin batera. Hilabeteetako lanaren ondoren, Beldarrain arkitektura estudioak irudikatutakoa proiektu arkitektoniko bihurtu du.
Eraikina Altzate auzo berrian eraikiko dute, Oiartzun ibaiaren ondoan eta bi solairutan antolatuta. Goiko solairua hiri-plataformaren mailako sarrera, kafetegia eta elkarteen bulego espazioekin pentsatu dute. Beheko solairuan, berriz, tamaina desberdinetako bederatzi entsegu gela eta biltegiak egongo dira. Eraikinaren diseinuak forma biribileko pabiloi itxura hartuko du, zulatutako aluminiozko oihal batekin inguratuta, eta paisaian arreta handiz txertatzeko asmoarekin garatu da.
Ekipamenduak 2.081 metro koadro izango ditu guztira eta ibai ertzetik ikusgai egongo da, parkera irekitzen diren leihateekin. Diseinu arkitektonikoak konfort akustikoa, energia-efizientzia eta jasangarritasuna lehenetsi ditu, musika eta ahotsa praktikatzeko beharrezkoak diren baldintza egokiak bermatzeko. Gainera, ostalaritza establezimendu bat ere izango da bertan. Eraikina auzoarekin eta ibai ertzeko pasealekuarekin estuki lotuta egotea da diseinatu dutenen asmoa.
