Amiantoaren beste biktima bat aitortu dute
Portuan eta Luzuriagan lan egin zuen Alejandro I.E. birikako minbiziagatik hil zen. Eritasuna amiantoaren eraginez izan zuen.
Asviamiek Donostiako epaitegien aurrean egindako elkarretaratze baten artxiboko irudia.Asviamie Asviamie Euskadiko Amiantoaren Biktimen Elkarteak jakinarazi du Pasaiako Portuan eta Luzuriagan lan egin, eta birikako minbiziagatik hil zen Alejandro I.E.-k Espainiako Segurtasun Sozialaren Institutuak amiantoaren biktima bezala izendatu duela, gaixotasun profesionalagatik hil zela, alegia. Hau da, bi toki horietan amiantoagatik lan egiteagatik izan zuela minbizia. “Aitortza horrek familiari ekarpen ekonomiko handiagoa jasotzeko aukera emango dio, baita kalte-ordainak eskatzeko eskubidea ere”, zehaztu du Asviamiek.
1966-1972 epean lan egin zuen Alejandro I.E.-k Victorio Luzuriaga enpresan. 1979tik 2017ra, berriz, Pasaiako Portuan mantenu mekanikari bezala. “Bi enpresa horietan amiantoarekin lanean izan zen, arriskuen informaziorik gabe, eta babes neurririk gabe”, esan du Asviamiek. Erretiratu aurretik, 2017an, Pasaiako Portu Agintaritzak Osalanen fitxategietan sartu zuen Alejandro I.E. “minbizia eragiten duen zuntzarekin lan egin zuelako, eta eskubidea izan zezan amiantoarekin lan egin duten langileen osasun zaintza berezia jasotzeko”.
2024ko irailaren 12an diagnostikatu zioten Alejandro I.E.-ri birikako adenokardioma zuela. Orduan, beharginak Espainiako Segurtasun Sozialaren Institutuari eskatu zion eritasunagatik lanerako ezgaitasun agiria eman ziezaiola. Urte hartako abenduaren 2an hil zen, erakunde horren erantzuna izan aurretik. Haren alargunari, beraz, ohiko alarguntasun pentsioa eman zioten. Asviamiek erreklamazioa aurkeztu zion erabaki horri 2025eko otsailean, eta hamar hilabete geroago onartu du Espainiako Segurtasun Sozialaren Institutuak amiantoaren biktima izan zela Alejandro I.E., eta beraz, horren araberako pentsioa jaso behar duela alargunak.
