Egitasmo eoliko erraldoien kontra mobilizatuko dira
Oiartzundik hurbil bi parke eoliko ezarri nahi ditu Repsol enpresak. Horri kontrakotasuna adierazteko elkarretaratzea egingo dute hilaren 29an Lintzirinen.
Oiartzundik hurbil bi parke eoliko ezarri nahi ditu Repsol enpresak. Han sortuko litzakeen argindarra garraiatzeko lineek inpaktu sakona izango lukete Oarsoaldean. Gaia lantzen hasi dira herritarrak, eta Bianditz-Domiko Bizirik plataforma sortu dute Oiartzunen horren gaineko informazioa eman, eta kontrakotasuna adierazteko. Izan ere, parke eoliko horiek sortutako energia Arkaleko (Gurutze auzoan dago) estaziora garraiatzeko asmoa du Repsolek, eta horrek ekarriko luke Oiartzunen nahiz Oarsoaldean sortutako elektrizitatea garraiatzeko bi linea handi egitea landa eremuan, dozenaka elektrizitate dorrerekin.
Egitasmoaren kontra dela adierazteko mugimenduan hasi da Bianditz-Domiko Bizirik herri plataforma. Hala, datorren ostegunerako (hilaren 29rako) elkarretaratzera deitu dituzte herritarrak Repsolek Lintzirinen duen gasolindegiaren parean, 17:00etan. Egun eta ordu berean, Hernanin enpresa horrek duen gasolindegian ere (Txillida-Leku ondoan dago) egingo dute mobilizazioa, Urumeako Mendiak Bizirik plataformak deitutakoa hori.
