Energiaren erabilera eraginkorragoa eta arduratsuagoa sustatzeko kanpaina abiatuko dute
Energia Garbiaren Eguna izango da hilaren 26an, eta Oarsoaldeko Energia Bulegoak kontzientziazio kanpaina bat abiaraziko du.
Energia aurreztea eta modu eraginkorrenean erabiltzea ezinbestekoa da. Hori dela eta, hilaren 26an, astelehenarekin, Energia Garbiaren Eguna ospatuko dute. Oarsoaldean ere energia modu arduratsuagoan erabiltzeko doako aholkularitza pertsonalizatua eskaintzeko bulegoa martxan jarriko dute datorren astean zehar. Astelehenetik ostegunera bitarte, jendearentzako arreta guneak jarriko dituzte: astelehenean Oiartzunen, asteartean Pasaian, asteazkenean Lezon, eta ostegunean Errenterian.
Helburua argia da: energiaren erabilera eraginkorragoa eta arduratsuagoa sustatzea. Egunerokoan erabilgarriak diren aholkuak eskainiko dituzte, eta aholku errazak helaraziko dituzte herritar guztien eskura egon daitezen. “Energia-trantsizioa zeregin kolektiboa da”. Tarifak optimizatzeko, erreformak egiteko, etxetresna elektriko eraginkorrak erosteko edota dirulaguntzei buruzko zalantzak argitzeko aholkuak emango dituzte.
Etxerako aholku batzuk nabarmendu nahi izan dituzte: tenperatu menderatu, alegia, etxean arropa eroso eta beroa erabili termostatoa tenperatura egokian (19-21ºC) mantentzeko. Hotza etxera ez sartzeko berrikusi leihoak eta ateak; beti ere, argi naturala etxera sartzeko aukera izan dezan. Gailu elektroniko askok stand by moduan energia kontsumitzen dute, eta horiek deskonektatu. Eta kontzientziaz sukaldatu, labearen edo plakaren beroa ondo aprobetxatu.
Bestalde, mugikortasun jasangarria bultzatzeko kanpainak bultzatu nahi dituzte Oarsoaldeko herrietan. Ibili, pedalei eragin, partekatu kanpainaren bitartez, ibilbide laburretan bizikletaz edo oinez joateari lehentasuna eman nahi diote; eta kotxea ahalik eta gutxien erabiltzeko modu eraginkorrean gidatzea sustatu nahi dute.
