PSE-EEk Lezo tentsio eremu dela goretsi, baina "anbizio gehiago" eskatu dio EH Bilduri
HAPOak eskaintzen dituen aukerak garatzeko eta Marrukenen eragiteko eskatu dute sozialistek.
Joxean Sanchez, PSE-EEren udal taldearen eleduna. Atzo egin zuten Hernaniko udaletxean Lezo etxebizitza arloko eremu tenkatu dela izendatzeko ekitaldia, hango alkatearekin, Tolosakoarekin, Mikel Arruti Lezokoarekin eta Denis Itxaso Jaurlaritzako Etxebizitza sailburuarekin. Lezoz gain, Hernanik eta Tolosak ere jaso zuten ofizialki izendapena. Horrekin pozik azaldu da herriko PSE-EE, baina “anbizioa” eskatu dio udal gobernuari. Eskaera bi arlotara zabaldu du: Hiri Antolamendurako Plan Orokorrak (HAPO) dituen aukerak gara ditzala, eta Marrukenen eragiteko nahia agertu du: han, 176 etxebizitza eraikitzea aurreikusia zela esan dute Joxean Sanchez buru duen alderdiko kideek, “horietatik %50 erregimen ezberdinetan babes publikokoak izango liratekeelarik”.
PSE-EEk esan duenez, haiek 2023ko azaroan aurkeztutako mozio bati esker hasi zela Lezo etxebizitzako gune tentsionatu izateko prozesua, “proposamena PSE-EEren eta EH Bilduren botoekin eta EAJren abstentzioarekin onartu zen”. Adierazpen horri esker, udalerriak honako neurriak aplikatu ahalko dituela argitu dute sozialistek:
- Indarrean diren alokairuen urteko igoeran muga bat ezartzea, Alokairuen Errebalorizazio Indizearen arabera (gaur egun % 2,8 da), hileko soldatak muga hori gainditzea eragotziz.
- Alokairu kontratuak beste hiru urtez eta baldintza beretan luzatzeko aukera, errentamenduak gutxienez bost urte iraun ondoren amaitzen denean.
- Kontratu berrietan prezioa mugatzea, eta muga horrek ezin izango du gainditu aurreko azken kontratuaren errenta.
Mikel Arruti alkateak atzo esan bezala, PSE-EEk berretsi du hutsik dauden etxebizitzak alokairu merkatura ateratzeko zerga-pizgarriak ezartzeko ahalmena izango duela Lezok, eta izendapenari lotutako Etxebizitza Planean babes ofizialeko etxebizitzak edo etxebizitza tasatuak eraikitzeko aukera izango dela Olatzar eta Isasti eremuetan.
Joxean Sanchezentzat eremu tentsionatu izendapena lehen urrats erabakigarria da, “baina horrekin batera HAPO garatu eta Marrukene bezalako proiektuak gauzatzeko apustu ausarta egin behar da, horiek funtsezkoak baitira Lezon etxebizitzarako eskubideari modu estrukturalean heltzeko”.
