Kantu eta piano errezitaldia Andra Mariren eskutik
Harmonia Ederrean programaren barruan antolatu du abesbatzak emanaldia; doan izango da, lekuak bete arte.
Andra Mari abesbatzak antolatuta eta Harmonia Ederrean zikloaren barruan kantu eta piano errezitaldia egingo dute larunbatean —hilak 7—Aleksandra Gladysheva sopranoak eta Iñaki Gezala piano jotzaileak. Andra Mari abesbatzaren egoitzan izango da emanaldia—Pablo Iglesias, 11—, 19:30ean hasita; sarrera doakoa izango da.
Antolatzaileek zehaztu dute, erromantizismoaren izpirituari omenaldia izangod ela bi musikarien emanaldia. Grieg, Tchaicovski, Rachmaninoff, Toldra eta Sorozabalen lanak interpretatuko dituzte.
Gladysheva Errusian jaio zen musikari bokazio handiko familia batean. Gaztetan hasi zen musika ikasten, 2018an GITIS, Moskuko Antzerki Arteen Institutuan graduatu zen eta 2022an master ikasketak burutu zituen Mireia Pinto mezzosopranoarekin. Ikasketa urteetan zenbait operetako pertsonaia nagusiak interpretatzeko aukera izan du bai Moskun (Errusia) eta Bartzelonan (Katalunia) ere. Zenbait lehiaketetan saritua izan da, besteak beste, Germans Pla Ciutat de Balaguer (2021) eta Grand Art Competition (2022).
Iñaki Gezala hondarribiarrak, bere jaioterriko Musika Eskolan hasi zituen piano ikasketak Miren Erostarbe irakaslearekin eta ondoren Irungo Udal Kontserbatorioan jarraitu zituen Françoise Danjourekin. 2018an ikasketa gradua nota altuenekin gainditu zuen eta Catalunyako Goi Mailako Musika Eskolan onartua izan zen; bertan egin zituen gradu eta master ikasketak.
Bestalde, pianorako euskal errepertorioan duen interesak ikerketara bultzatu zuen eta Valentziako Nazioarteko Unibertsitatean (Herrialde Katalanak— egin zuen Musika Ikerketa Masterrean (2025) Valentín Larrea Iturbe (1876-1970) pianista eta konpositorea aztertu du.
Pianista ibilbide sendoa ari da egiten eta hainbat sari irabazi ditu , besteak beste, Donostia Nazioarteko Piano Lehiaketaren lehenengo (2009) eta bigarren saria (2020), Isaac Albeniz Jaialdian lehen saria (2021) eta Eurasia Piano Forum (2021).
Andra Mari Abesbatzak herritar guztiei egin die bertaratu eta emanaldiaz gozatzeko gonbita.
