Antxoko kalistenia parkea gertutik ezagutzeko aukera eskainiko du udalak
Pasaitarrek gune berriaren gaineko laguntza eta gomendioak jasotzeko aukera izango dute, Maddi Marquet kirol orientatzailearen bidez. Zerbitzua astelehenetan eskainiko da, 18:30etik 19:30era.
Pasaiako Udalak kalistenia parke bat ireki berri du Antxoko Ibaiondo frontoiaren ondoko plazan. Iniziatibaren helburua da aire libreko kirola sustatzea, “jarduera fisikorako sarbidea erraztuz eta espazio publikoaren erabilera soziala indartuz”.
Kalistenia parkeetan norberaren gorputzaren pisua da entrenamendurako tresna nagusia. Ezaugarri horrek “kirola modu librean, irisgarrian eta doan” egiteko aukera ematen duela adierazi du udalak, “jarduera fisikoa demokratizatuz”.
Kalistenia parkea martxan dago, eta gune hori gertuagotik ezagutzeko aukera eskainiko du udalak. Pasaitarrek Maddi Marquet kirol orientatzailearen laguntza eta gomendioak jasotzeko aukera izango dute, ekainaren 30era arte. Zerbitzua astelehenetan eskainiko da, 18:30etik 19:30era.
Honakoa esan du Julen Rodriguez Kirol zinegotziak Antxoko gunearen inguruan: “Kirola aire librean egiteak onura fisikoak ez ezik, ongizate mentala eta soziala ere ekartzen ditu, eta horregatik, espazio hauek sortzea funtsezkoa da. Kalistenia parkea edonorentzat pentsatuta dago: edozein adin, maila edo egoera fisiko izanda, kirola egiteko aukera ematen duelako. Gainera, beti zabalik dago, eta horrek kirola benetan denon eskura jartzen du. Gune berri hau parke bioosasungarriaren ondoan kokatzea ez da kasualitatea izan. Belaunaldien arteko espazio bat sortu nahi izan dugu, non adin desberdinetako pertsonek elkarrekin partekatu ahal izango dituzten kirola, aisialdia eta harremana. Gure helburua argia da: jarduera fisikoa sustatzea, modu errazean, doan eta edonorentzat irisgarri. Parke honek aukera ematen du bakoitzak bere erritmoan entrenatzeko, presiorik gabe, eta hori oso baliagarria da”.
