Hobekuntzak egiten ari dira Donibaneko frontoian
Udalak pilotalekuko estalkiko zati gardenak aldatuko ditu gaurtik asteazkenera bitartean. Lanek irauten duten denboran ezin izango da gunea erabili.
Pasaiako Udala hobekuntzak egiten ari da Donibaneko frontoian. Zehazki, pilotalekuko estalkiko zati gardenak aldatuko dira, gaurtik asteazkenera bitartean (hilaren 2tik 4ra). Denborarekin malgutasuna galdu dute pieza horiek, eta euriaren eta kazkabarraren ondorioz, zulatu egin daitezke, ur sarrerak eraginez.
Horiek ekiditeko, estalkiko piezak aldatuko dituzte. Horrez gain, teilatu hodiak ere garbituko dira. Lanek irauten duten denboran ezin izango da frontoia erabili (hilaren 4ra arte). Jarduketa horietara 4.286,20 euro bideratuko dira.
