Oiartzun tentsio handiko eremu izendatzeko eskaera egin dute
Eusko Jaurlaritzari egindako eskaera udala lantzen ari den etxebizitza plan integralaren parte da. Otsaileko bilkuran onartu zuten eskaera egitea.
Oiartzungo Udala “desio den etorkizuneko Oiartzun irudikatu eta herritarren beharretara egokituko den etxebizitza plan integrala diseinatzeko” lanean ari da, eta, diotenez, horretarako “bere esku dauden eskumen guztiez baliatzen ari da”. Hori horrela, azaldu dute etxebizitza plan integral horren erpinetako bat dela Oiartzun tentsio handiko eremu izendatzeko Eusko Jaurlaritzari egindako eskera.
Joana Mendiburu Garaiar Oiartzungo alkatearen hitzetan, eskaera hori ez da erabaki isolatu bat, plan oso baten parte baizik. “Udalak denbora luzea darama etxebizitzaren gaia lantzen, estrategia bat tratatzen, eta erabakiak eta neurriak hartzen. Begirada berarekin jarraituko da lanean hemendik aurrera ere”.
Zehatzagoak izate aldera, iragan otsaileko osoko bilkuran onartu zen aho batez Eusko Jaurlaritzari Oiartzun tentsio handiko eremu izendatzeko eskaera egitea.
Udaletik azaldu dutenez, Oiartzungo Udalaren etxebizitza politikaren oinarriak dira “espekulazioari trabak jartzea, herritar zaurgarrienak babestea, egitura eta antolaketa urbanistikoa jasangarria izatea, eta etxebizitza bizileku gisa lehenestea”.
Plan integralaren erpinak
- Etxebizitza hutsen inbentarioa: Udala lanean ari dela diote, eta helburua dela egoeraren diagnostikoa egitea, etxejabeen artean alokairua sustatzea, eta hori egindakoan hutsik geratzen direnei ondasun higiezinen gaineko zergan gainkargua aplikatzea.
- Bzigune eta ASAP programak: Etxebizitza hutsak Bizigune edota ASAP programen bidez alokairuan jartzen dituzten etxejabeek %50eko hobaria dute ondasun higiezinen gaineko zergan. Horrez gain, diote programa horiek euren etxeak baldintza onetan alokatzea bermatzen dietela etxejabeei.
- Etxebizitza tasatuen salerosketaren eskumena eta kontrola: Saltzaile eta erosleek udalaren bitartez egin behar dituzte tramiteak. “Helburua etxebizitza tasatuak legez dagokien prezioan saltzea bermatzea da”.
- Eredu guztietako etxebizitzak promozio berrietan: Herrian egingo diren promozio berrietan “eredu guztietako etxeak” egongo dira: alokairu sozialekoak, babes ofizialekoak, tasatuak eta libreak. Horrez gain, promozio berri horien proiektuak garatzeko parte hartzeko prozesuak egin dira auzotarrekin.
- Etxebizitza eta establezimenduei erabilera turistikoa emateko baldintzak: Hiri Antolamendurako Plan Orokorreko hala dagokion ordenantza aldatu da erabilera turistikorako etxebizitza eta establezimenduak mugatzeko.
- Tentsio handiko eremu izendapena: Eskaera egin zaio Eusko Jaurlaritzari. Erantzunaren zain geratuko da udala.
