Mugaldeko udaleku ibiltarietan izena emateko epea zabaldu dute
Uztailaren 13tik 19ra izango da jarduera, eta Arantza-Oiartzun-Urruña-Sara bidea egingo dute 2011-2012 artean jaiotako 40 gaztek.
Arantza-Oiartzun-Urruña-Sara ibilbidea egingo du aurten Mugaldeko Udalekuak. Gaztetxoei begirako eskaintza da, eta, uztailaren 13tik 19ra egingo dute bidea 2011-2012 urteetan jaiotako haurrek.
Alabaina, udaleku horietan parte hartzeko lehentasuna izango dute Bortzirietan, Oiartzunen, Saran edota Urruñan erroldatuta daudenek. Era berean, beharrezkoa izango parte hartzeko euskara jakitea.
Udalekua Arantzan hasiko da, uztailaren 13an, 10:00etan, eta egunez egun Sara arteko ibilbidea osatuko dute. Lehenbizi Oiartzundik pasako dira, eta gero Urruñatik, baina tarten hamaika jarduera egingo dituzte herriz herri.
Udalekuak uztailaren 19an bukatuko dira Saran, eta berriki izen ematea zabaldu dute. Hots, inskripzioa egiteko aukera egongo da hilaren 31 bitartean. Udalekuetan plaza mugatuak daude, eta gehienez 40 gaztek hartuko dute parte.
Udalekuen prezioa 175 eurokoa da, eta familiek apirilean jakingo dute izen ematea onartu zaien ala ez, eta hala izatekotan, antolatzailea jarriko da eurekin harremanetan ordainketa bideratu eta behar den dokumentazioa eskatzeko (antolatzaileek ohartarazi dute gutxienez hamabost pertsonak eman behar dutela izena udalekuak burutzeko).
Aipatutakoaz gain, antolatzaileek azpimarratu dute jarduera horren xede nagusia “muga administratiboak gainditzea” dela, baina, badituztela bestelako zenbait helburu ere:
- Iparraldeko eta hegoaldeko gazteen arteko harremanak eraiki eta sendotzea.
- Euskara eta euskalkiak ezagutu eta praktikatzea.
- Parte hartzea bultzatzea.
- Euskal Herriko hainbat txoko ezagutzea natura, kultura eta kirola ardatz hartuta.
