40. urteurrena ospatzeko zenbait jarduera antolatu ditu Giriziaren mendi taldeak
Hilaren 12an bideo emanaldia egingo dute, eta hilaren 15ean, berriz, ibilaldia eta bazkaria Girizia elkartean. Txartelak salgai daude.
Girizia mendi taldearen artxiboko irudia. Girizaren mendi taldeak 40 urte beteko ditu aurten, eta hori ospatzeko zenbait ekintza antolatu ditu hilaren 12tik 15era bitartean. “40 urte herrigintzan, aldapan gora eta behera, kalean eta mendian” diote sareetan, eta beste horrenbeste urtez bide beretik jarraitzeko asmoa dute mendizaleek.
Datorren ostegunean (hilak 12) jarri dute lehen hitzordua, eta egun horretan bideo emanaldia egingo dute Oiatzungo pleno aretoan. Hain justu, 2023-24 ikasturtean zein 2025ean egindako irteeren errepasoa egingo dute 19:30ean hasita, eta luntxa izango da gero.
Horretaz gain, baina, hilaren 15ean (igandea) Txurrumurrura irteera eta bazkaria egingo dituzte Girizia elkartean. Mendi irteera egingo dutenak goizeko zortzietan elkartuko dira ikastolako aparkalekuan, eta autobusez igoko dira Elurretxera. Behin Txurrumurrura igotzen direnean, txoriari bisita egin eta jaitsieran salda eta pintxoa hartuko dituzte Elurretxen. Gero, elkarrekin joango dira oinez Oiartzunera. Alabaina, jakinarazi dute eguraldiak lagunduko ez balu ekitaldia Arritxulon egingo litzatekeela, eta minetako aparkalekutik oinez igoko liratekeela ordu berean.
Ondoren, plazan musikaz alaiturik poteoa egingo dute, eta Girizian bazkalduko dute denek. Hortaz, bazkariko zein autobuseko txartelak salgai daudela jakinarazi dute Marisol janari dendan zein Tolaita tabernan. Bazkariko txartelak 40 euro balio ditu, eta autobusak, haatik, bost euro.
