Jende andana elkartu da Elizalde Eskolaren nesken herri kirol erakustaldian
Urte osoko egitaraua ondu du Elizalde Eskolak 50. urteurrena ospatzeko. Martxoaren 8arekin bat eginez, nesken herri kirol erakustaldia egin zuten atzo.
Atzo eman zieten hasiera Elizalde Eskolaren 50. urteurreneko ekitaldiei. Nesken herri kirol erakustaldia egin zuten eskolako patioan, eta dozenaka herritar elkartu ziren bertan.
Ekitaldiari hasiera bertsoekin eman zieten, eta kirol ikuskizunarekin jarraitu zuten gero. Bertan, Patrizia Martin harri jasotzaileak bi minutuko saioak burutu zituen harri kubiko, errektangular eta bolarekin bere trebezia erakutsiz. Gainera, Uxue Ansorregik eta Amalur Arbelaitzek Euskal Pentatloia osatu zuten: alegia, harri bola jaso, aizkoran aritu, txingak eraman, trontzan jardun eta korrika errelebotan aritu ziren.
Giro hunkigarria sortu zela kontatu dute, bai eta Elizalde Eskolaren 50. urteurreneko koordinazio batzordeak eskerrak eman nahi izan zizkiela ere kirolariei egindako esfortzuagatik eta eskainitako ikuskizunagatik. Noski, patioa bete zuten herritarrak ere izan zituzten gogoan. “50 urtetako erresistentzian Oiartzungo eskola publikoaren alde lan egin duten guztiei eginiko aitortzaren adibide garbia da”.
Egun borobila izan zen atzokoa Elizaldeko komunitatearentzat, baina oraindik badute martxoan zertaz gozatua, hilaren 27an Doneztebe plazan Koloretako sustrai izeneko 50. urteurreneko abestiaren aurkezpena egingo baitute txokolatada eta DJ batekin girotuta, eta, hori gutxi balitz, hilaren 29an Elorsoro kiroldegian judo erakustaldia egingo baitute.
Hona hemen Elizaldek HITZAri helarazitako zenbait irudi:
