Administrazio publiko euskaldunaren alde egin du EAJk
Herritarrek hizkuntza ofizial bietan harremanak izateko aukera bermatzea ez dela aukera politiko bat defendatu dute jeltzaleek, eskubide aitortua baizik.
Elixabete Murua EAJren bozeramailea. Errenteriako Udalaren LEP Lan Eskaintza Publikoaren aurkako inpugnazioaren aurrean administrazio publiko euskaldun baten aldeko konpromisoa berretsi du alderdi jeltzaleak. Herritarrek bi hizkuntza ofizialetan harremanak izateko aukera bermatzea ez dela aukera politiko bat adierazi du, “ezta kontzesio bat ere, eskubide aitortua da, eta administrazio publikoek betebehar hori bermatu behar dute”.
Hori horrela, “zentzuzkoa” jo du administrazio lanpostuetan euskara eskakizuna betetzea, “arreta egokia eskaintzeko”. Harago jo du EAJk eta baldintza horiek zalantzan jartzeak “administrazioak, herritarren hizkuntz eskubideak bermatzeko duen gaitasuna auzitan jartzea” dakarrela gaineratu du, “ezin da elebiduna den administraziorik eraiki, bertan lan egiten dutenek euskaraz herritarrei normaltasunez arreta emateko gaitasunik ez badute”.
Euskarak Errenterian presentzia nabarmena duela esan du bestalde, eremu sozialean, kulturalean zein komunitatean, eta hori horrela, ezin dutela errealitate horretatik aldendu erakunde publikoek, ezta atzera egin ere hizkuntz normalizazioan, “euskaraz normaltasunez artatzeko gai ez den administrazioak ez luke herritarrekiko duen betebeharra beteko”.
Euskararen defentsa, alderdiaren konpromiso politiko eta historikoa dela adierazi du gainera, Elixabete Murua jeltzaleen bozeramaleak, “guk herri honen nortasuna eta eskubideen defentsan sinisten dugu, eta horregatik hizkuntzaren erabateko normalizazioa dugu xede”. Atzera pausurik ez duela onartuko adierazi du alderdi jeltzaleak hizkuntza eskubideen bermean, “ezta administrazio publikoetan euskararen normalizazioan”. Konpromisoa berretsi du azkenik, “administrazio publiko, hurbil, moderno eta euskaldun baten alde, herritar guztien hizkuntza eskubideak bermatzeko eta euskara, herri honen berezko hizkuntza den heinean, indartzeko”.
