Labore Oarsok bi langile kontratatu nahi ditu
Oiartzungo dendarako dendari baten bila eta dendarien oporrak eta bajak egingo dituen bi pertsonen bila ari dira. Apirilaren 7a baino lehen bidali behar da curriculuma.
Bi lan eskaintza iragarri ditu Labore Oarsok Labore Oarsok jakinarazi duenez, azken hilabeteetan jauzi kualitatiboak ematen ari da proiektua; familia-bazkide kopurua ere emendatzen ari dela diote, eta ondorioz, horrek guztiak lan karga areagotu duela.
Gauzak horrela, bi lan eskaintzaren berri eman dute. Batetik, lan talderako kide iraunkor baten bila ari dira. Aldi baterako kontratua eskaintzen dute, mugagabe egiteko aukerarekin. Astean 30 orduko lan jarduna da, eta lanaldia astelehenetik larunbatera egiten dute, txandaka. Ordutegia egunaren arabera aldatzen dute, baina goizez eta arratsaldez egiten dute, gainerako lan taldearen ordutegiaren osagarri.
Bigarren eskaintza, aldiz, behar puntualetarako da. Aldi baterako lan kontratua eskaintzen dute, ordezkatu beharko den dendariaren lan jardunaren araberakoa, astean 25 ordukoa. Lan jarduna astelehenetik larunbatera txandaka izango da, goizez eta arratsaldez. Hala ere, aurreratu dute gainerako langileen oporraldia nagusiki ekainetik urrira bitartean kontzentratzen dela. Halaber, bajak aurreikusten “oso zailak” direnez, lan poltsan pare bat pertsonarekin kontatu nahi lukete.
Hona hemen xehetasunak eta eskakizunak:
- Dendaren ordutegia:
- Astelehenetik ostiralera: 09:30-13:30 / 16:30-20:00
- Asteazkenetan: 09:30-20:00
- Larunbatetan: 10:00-13:00
- Ardurak eta betebeharrak:
- Finkatutako irizpideak jarraituz, denda hornitzeea
- Bazkide kontsumitzaileekin tratu adeitsua izatea
- Hornitzaileei harrera, eskariak ongi datozela egiaztatu eta dagokion kasuan itzulketak bideratzea
- Kontsumitzaileek erosketak kobratzea
- Asteroko enkarguen kudeaketa
- Biltegiaren antolaketa egokiaz arduratzea
- Dendan eskaintzen diren produktuen ezagutza
- Dendaren garbiketa
- Programa informatikoa ezagutu eta elikatzea
- Balorazio irizpideak:
- Dendari bezala eskarmentua izatea
- Euskaraz zein gazteleraz ongi hitz egin eta idazteko gaitasuna izatea
- Elikadura burujabetzaren ezagutza
- Taldean lan egiteko gaitasuna
- Langilea eta bizia izatea
- Baikortasuna, enpatia eta jarrera eraikitzailea
- Egoki komunikatzeko gaitasuna
- Informatikako ezagutza
- Labore Oarsoko bazkide izatea
- Oarsoaldekoa izatea
- Herrigintzan esperientzia izatea
- Ordenatua, proaktiboa eta erabakiak hartzeko gaitasuna izatea
Oro har, Labore Oarsoren proiektuaren printzipio eta filosofiarekin bat egiten duten pertsonen bila dabiltza, eta interesa dutenek curriculuma bidali beharko dute helbide honetara apirilaren 7a baino lehen.
