Etxebizitza tasatuen lehen zozketarako onartuen behin behineko zerrenda, argitara
Hasieran etxebizitza bakarra zozkatzea aurreikusi zuten, baina orain ezaugarri berak dituen beste bat gehitu da eskaintzara.
Atzo bertan onartu zuten alkate dekretuz etxebizitza tasatuen urteko lehen zozketarako onartuen zerrenda. Interesdunek dute zerrenda ikusteko aukera SMS bidez jaso duten kode bat erabilita; hemen dago zerrenda.
Etxebizitza tasatuen eskatzaileen udal erregistroan izena emanda dauden 245 familia unitateetatik 185 daude apirileko zozketako onartuen behin behineko zerrendak, horiek direlako parte hartzeko bete beharreko baldintzak betetzen dituztenak eta beren lehentasunek zozkatuko diren etxeen ezaugarriekin bat egiten dutelako –diru sarreren muga baieztatzeko dago–. Beraz, zerrenda horretan agertzen ez direnak ez dute zozketa horretan parte hartuko. Alabaina, hilaren 10era arte dute epea alegazioak aurkezteko, zozketa hilaren 29an egingo baita.
Etxebizitza tasatuen urteko lehen zozketan Altzibarko Olalde etxadian dauden bigarren eskuko bi etxebizitza zozkatuko dituzte, hiru logelakoak bata zein bestea. Gainera, trastelekua eta garajea ere badituzte. Horiek 275.000 euro eta 280.000 euroko behin behineko prezioa dute, BEZik gabe.
Hasieran etxebizitza bakarra zozkatzea aurreikusi zuten, baina “azken orduan” ezaugarri berak dituen beste bat gehitu da eskaintzara. Lehen etxebizitzaren ezaugarri berak dituenez, eskatzaile onartuen zerrenda bakarra nahikoa dela diote zozketarako.
