Udalak %85eko aurrekontu exekuzioarekin itxi du 2025a
2025eko aurrekontu likidazioa aurkeztu zuten plenoan, eta "gauzatze maila handia eta aurreko urtearekiko diru sarreren igoera" nabarmendu zituzten.
Errenteriako Udaletxearen artxiboko irudi bat. Errenteriako Udalak 2025eko aurrekontu likidazioa aurkeztu zuen azken plenoan, eta bertan gauzatze maila handia eta aurreko urtearekiko diru sarreren igoera nabarmendu zuen.
Gauzatze maila 2024koaren antzekoa izan dela diote, baina kontuan hartu behar dela diote betiko aurrekontua 76,118 milioi eurokoa izan zela, 2023an baino 1,3 milioi euro gehiago.
Era berean, diote nabarmentzekoa dela aurrekontuaren gauzatze maila handia bai langileei, ondasunei eta zerbitzuei dagokienez, bai eta transferentzia arruntei dagokienez ere, non gastuaren ehunekoak behin betiko aurrekontuaren %90 gainditzen baitu. Inbertsioei dagokienez, guztira 6,6 milioi euro gauzatu dira.
Hots, jakinarazi dute “udal zorra %11 murrizteari esker finantza gastua ere murriztu” egin dela.
Alabaina, Errenteriako Udalak handitu egin ditu diru sarrerak, nahiz eta 2025ean milioi bat euro murriztu den Udal Finantzaketarako Foru Funtsaren aurreikuspena. “Batetik, zerbitzuaren oreka lortzeko Hondakinei eta Ekonomia Zirkularrari buruzko legea betetzeko egin diren doikuntzengatik, eta, bestetik, beste administrazio batzuen diru laguntzak lortzearen ondoriozko diru sarreren aurreikuspenak bete direlako”, diote.
Diru sarrerei dagokienez, azpimarratu dute etxebizitza tasatuak eraikitzeko udal lokalean salmentaren eta 2025ean egindako hirigintza jardueren ondorioz izandako hazkundea.
“2023-2025 epean udal aurrekontuak hazkunde neurritsua eta eraginkorra izan du. Hasierako aurrekontuaren gauzatze maila %95 ingurukoa izan da, eta behin betikoa %85ekoa. Diru sarreren aurreikuspenak, neurri handi batean, kanpoko faktoreek baldintzatzen dituzte, nagusiki Udal Finantzaketarako Foru Fondoaren aldaketek, baina beti aurreikuspenen %80tik gora daude”.
Azkenik, diote epe horretarako metatutako zorraren murrizketa %21ekoa dela gutxi gora behera.
Errenteriako Udalak prentsa oharrarekin batera argitaratutako grafikoa.
Eta, honela amaitu dute: “Horrek guztiak erakusten du udalaren kudeaketa ekonomikoa egonkorra eta kontrolatua dela, eta aurrekontua modu sendoan gauzatzen dela, diru sarrerak hobetzen direla eta, beraz, politika publikoak sendotzen direla, eta udal zorra murrizten jarraitzen dela”.
