"Noiz utziko diguzue bizitzen?"
Elkarretaratzea egin dute Iruñeko erailketa matxista salatzeko. 2003az geroztik 136 emakume eta hamahiru haur erail dituzte gizonek Euskal Herrian.
Oiartzungo Feministen Asanbladak deituta, elkarretaratzea egin zuten atzo arratsaldean Sanduzelaiko (Iruñea) erailketa matxista salatzeko.
Igande goizaldean 37 urteko emakume bat hil zen etxe bateko hirugarren solairutik erorita, eta, beste behin, Oiartzungo Feministen Asanbladak “mina eta amorrua” adierazi zituen herriko plazan, 2003az geroztik 136 emakume eta hamahiru haur erail baitituzte gizonek Euskal Herrian.
Ohi moduan, hitzartzearen hasieran babes osoa adierazi zien asanbladako kideek eraildako emakumearen familiari, lagunei eta gertukoei.
Gero, honela jarraitu zuten: “Behin eta berriz diogu barruan dugula gaitza. Gure bikotekide, bikotekide ohi, aita, seme edo anaiak ari dira gu hiltzen. Azken hamar egunetan muturreko indarkeriazko hiru kasuren berri izan dugu. Nahikoa da! Amorruak eta minak ez dute etenik! Gizonek zuen erantzukizuna duzue honetan guztian. Egiturazko arazo honen sostengatzaileak zarete. Noiz bukatu behar duzue zuen arteko konplizitate eta isiltasunarekin? Noiz utziko diguzue bizitzen?”.
Hots, sistema hau emakumeentzat “jasanezina” dela esanez jarraitu zuten: “Sistema zisheteropatriarkal, kapitalista, arrazista eta kolonial honetan emakumeok emakume izate hutsagatik erailtzen gaituzte, eta indarkeria matxista egunerokotasunean jasan behar izaten dugu; lantokian, kalean, etxean. Erailketak indarkeria matxistaren aurpegirik lazgarrienak dira. Premiazkoa da egiturazkoa den indarkeria honekin amaitzea; egunero zapaltzen gaituen sistema krudel hau irauli behar dugu”.
Era berean, nabarmendu zuten erakunde publikoek ere badutela zer egina, baliabideak beharrezkoak direlako horrelako egoerak saihesteko eta gertatu aurretik neurriak hartzeko. Hartara, diote ez direla nahikoak erakunde publikoek abian dituzten programak eta baliabideak; “gaurko kasua horren adierazle da. Izan ere, emakumea bere etxean zela, indarkeria matxistagatik urruntze agindua zuen bikotekide ohia, gizonezkoa, etxean sartu da. Istilua izan ondoren, emakumea etxetik ihes egiten ahalegindu da leihotik, eta saiakera horretan galdu du bizia”.
Hartara, azpimarratu dute benetako justizia bat izan dezagun, erabaki arduratsuak hartu behar dituztela. “Prebentzioa eta areta behar ditugu emakumeok, eta indarkeria matxistarekin amaitzeko politika feministak eta ausartak behar ditugu. Ez digute kendutako bizitza itzuliko erailketa baten ondoren esaten dituzuen hitzek”.
Azkenik, gehitu zuten emakumeak ez direla biktimak soilik, subjektu politikoak ere badirela, eta autodefentsa feminista ez dela soilik norbera defendatzea, gure arteko aliantzak eraikitzea, elkar zaintzea eta biolentziari aurre egiteko gaitasun kolektibo eta politikoa garatzea baizik. “Gure bizitzak defendatzeko prest gaude, elkarrekin eta tinko. Gure artean aliantzak sortzen, gune seguruak eraikitzen, ahizpatasunetik eta kolektibotasunetik politika egiten jarraituko dugu. Egungo egoera irauli behar dugu denok aske bizi ahal izateko”.
