Madalenak iragartzeko kartel bila
Lanak aurkezteko epea GAO Gipuzkoako Aldizkari Ofizialean deialdia argitaratu eta hurrengo egunean hasiko da, eta maiatzaren 8ra arte izango da zabalik.
Madalenetako kartel lehiaketako deialdia datozen egunetan zabalduko duela jakinarazi du udalak; aurtengoa berrogeigarren ekitaldia izango da. Ohi bezala, bi kategoria izango ditu: orokorra eta haurrena. Kategoria orokorrean saritutako lana aurtengo Madalen Jaien kartel ofiziala izango da eta irabazleak 1.050 euro jasoko ditu sari.
Haurren kategoriako irabazlea, berriz, madalenetako haurrentzako programazioaren irudia izango da, eta egileak 150 euroko bonua jasoko du eskola materiala erosteko. Kategoria horretan DBH 2. mailara arteko haurrek hartu ahal izango dute parte.
Herri Saria ere izango da aurten. Herritarrek gustukoen duten kartela aukeratu ahalko dute, eta horretarako aurrez hautatutako kategoria orokorreko 50 lan gehienez, eta haurren kategoriako 15, Xenpelar Etxean izango dira ikusgai maiatzaren 18tik 30era bitartean. Botoa maiatzaren 26ra arte eman ahalko da. Bozkatuenaren egileak bi gonbidapen jasoko ditu madalenetako herri bazkarian parte hartzeko.
Lanak aurkezteko epea GAO Gipuzkoako Aldizkari Ofizialean deialdia argitaratu eta hurrengo egunean hasiko da, eta maiatzaren 8ra arte izango da zabalik. Epe horren hasieran aktibatuko du udalak Herri Bizia webgunean lanak aurkezteko galdetegia (klik hemen).
Epaimahaiak maiatzaren 27an jakinaraziko du erabakia, jendaurrean.
