Lousada kalean bizi diren 20 familia kaleratze arriskuan daudela salatu du Etxebizitza Sindikatuak
Ekainaren 24an Alokabidek familia horiek kaleratuko dituela salatu du Etxebizitza Sindikatuak eta instituzio publikoek ez dietela inolako aterabiderik eskaini.
Lousada kaleko eraikina, inauguratu zutenean 2021ean. Lousada kaleko 40. zenbakiko bizilagunek bizitzen ari diren egoera larria salatu dute. Oarsoaldeko Etxebizitza Sindikatuak jakinarazi duenez, eraikin horretan bizi diren 20 familia—40 pertsona, adingabeak tartean— kaleratze arriskuan daude. Oharra bideratu dute hedabideetara bizilagunek eta Oarsoaldeko Etxebizitza Sindikatuak gertaeren kronologia eta egungo egoeraren berri emateko.
Horren arabera, 2021eko ekainean udalak Eusko Jaurlaritzari emandako lurrean eraikitako Alokabideko zuzkidura bizitokietan bizitzen hasi ziren Errenteria-Oreretako 51 familia. Bost urterako kontratua sinatu zuten orduan, “Alokabidek hori egin ezean etxebizitza publikoko eskaera zerrendetatik urtebetez kanporatuko gintuela adierazi ondoren”.
Bost urterako kontratu horiek ekainean bukatuko zaizkie, eta hortaz 20 familia osatzen dituzten 40 pertsona baino gehiago “kale gorrian” geratzeko arrisku bizian direla salatu dute, “tartean adingabeak”. Horren aurrean Alokabidek “momentuz” eskaini dien alternatiba bakarra “etxebizitzarako eskubide subjektiboa” eskatzea izan dela azaldu dute: “Eskubide horren helburua familiei etxebizitza alternatiba ematea dela esaten badute ere, egoera zaurgarrian dauden familia asko ez ditu aintzat hartzen. Zaurgarritasun muga horiek oso baxuak dira eta horrek, etxebizitza merkatu librera bideratzen gaitu, horretarako sarbidea gutiz ezinezkoa bazaigu ere”.
Kexu azaldu dira eta haserre politikariekin, “ahoa betetzen zaie babes ofizialeko merkatu publikoaz hitz egiterakoan, etxebizitzarako sarbidea eskuragarri egiten ari direla esaten duten bitartean, gero eta gehiago gara etxebizitza eskubidea bermaturik ez dugun familiak”. Bien bitartean jabe handiek eta errentatzaileek “poltsikoak betetzen” jarraitzen dutela etxebizitzaren gehiegizko prezioen eta langile familien baldintza txarren kontura salatu dute.
Larritasunetik egin dute galdera familia horiek, kale gorrian ikusten baitute euren burua, “ekainaren 24an alokabidek 40 bizilagun kanporatuko ditu euren bizitokietatik. Nora joango gara? Familia gehienok ezin dugu alokairurik ordaindu, egungo prezioak jasangaitzak baitira, eta etxebizitza bat erostea pentsaezina da gu bezalako milaka pertsonentzat Euskal Herrian”.
Instituzio publikoek ez dietela oraingoz aterabiderik eskaini errepikatuko dute, “nahi eta guk behin eta berriz adierazi dugun moduan prest geundeke etxebizitza alternatiba ezberdinak aztertzeko; bai Lousadan jarraitzea, edota beste toki batera joatea”. Hori horrela deia egin diete erakunde publikoei etxebizitzarako “eskubide erreal bat” bete dadin neurriak har ditzaten, “eta 40 pertsona kalean utziko dituen egoera hau ekidin dezaten”,.
Halaber, antzeko egoera bizi dezaketen pertsonei “elkartasunerako eta batasunerako deia” luzatu diete, elkarlanerako.
