IV. Berdintasun Plana lezoarrekin eraiki nahi du udalak
Plana eraginkorra eta partekatua izatea nahi du udalak, eta horretarako parte hartze saioak antolatu ditu.
Lezoko Udalak IV. Berdintasun Plana diseinatzeko prozesua abiatu du. Udalak uste du planak eraginkorra eta partekatua izan behar duela, eta hori horrela izan dadin lezoar orori begirako bi parte hartze saio ireki antolatu ditu hilaren 23rako (ostegunerako) eta 27rako (astelehenerako), biak ala biak 17:30etik 19:30era Kultura Aretoan. “Berdintasun Planaren helburua da herrian emakumeen, pertsona ez-bitarren eta gizonen arteko berdintasuna sustatzen jarraitzea, orain arte egindako lana ebaluatuz eta etorkizunerako erronka nagusiak identifikatuz”. Horretarako, herritarren, eragileen eta kolektiboen parte hartzea sustatu nahi du udalak, “ikuspegi anitzak jaso eta Lezoko eguneroko bizitzan berdintasunak dituen eraginak sakonago ulertzeko”.
Udalak garbi du berdintasuna ez dela eremu jakin batera mugatzen. Esparru denetan hartu behar da aintzat, era efektiboan. “Gure kaleetan, jaietan, zaintzan eta eguneroko harremanetan oinarrizkoa da. Horregatik, herritar guztien ekarpena ezinbestekoa da politika publiko egokiak diseinatzeko”.
Bi saioetan landuko diren gaiak, besteak beste, orain arteko berdintasun politikaren balorazioa, gaur egungo Lezoko egoeraren azterketa eta etorkizunerako lehentasunak zehaztea izango dira. Horregatik, lezoar guztiei dei egin de udalak era aktiboan parte har dezaten datozen bi saioetan, nahiz plana egikaritzeko egingo diren bestelako jardueretan, “etor daitezela etorkizun berdinzaleago eta bidezkoago baten eraikuntzan laguntzera”.
