Mataderoa birgaitzeko lanak hasi ditu udalak
Hiltegi zaharraren ondare arkitektonikoa zaindu eta balioan jarriko du obrak.
Joan den astean hasi zituzten Mataderoko lanak. Iztieta-Ondartxoko Mataderoa birgaitzeko lanak hasi zituen udalak pasa den astean. Hiltegi zaharraren ondare arkitektonikoa zaindu eta balioan jarriko duen obra Iparragirre eraikuntzak SL enpresak egingo duela azaldu du udalak, urtebete inguru iraungo du eta 1.5000.000 euroko aurrekontua du.
Ingurune hori biziberritzeko urrats handia suposatzen duela eraikin historiko horren birgaitzea nabarmendu du udalak, izan ere, jarduketa sorta baten segida da honakoa: “Aurretik hiltegi atzeko pabiloiak eraitsi zituen udalak, eta ondoren, dagoeneko Hibaika erabiltzen ari den ontzientzako biltegi bat eraiki zen”.
Mataderoaren birgaituta Iztieta-Ondartxo auzoa biziberritzeko “garrantzi handiko” azpiegitura komunitarioa bilakatuko dela eraikina gaineratu du udalak. Gaur egun arte izan duen erabilera nagusia mantentzen jarraituko du, hau da, kirola, Hibaika Arraun Elkartearen egoitza izaten jarraituko duelako; lanak bukatuta, instalazio moderno eta berrituak izango ditu Hibaikak, eta 275 metro koadroko gimnasioa.
Kirolekin lotuta gainera, espazio horretan, ur kirol herrikoientzako gune bat egokitzea ere aurreikusia dago.
Horietaz gain beste baliabide eta zerbitzuak ere eskainiko ditu Matadero berriak, tartean, Gazteleku berria, 13 eta 17 urte arteko gazteei begira. Nerabeek partaidetza prozesuetan egindako eskaerari erantzuten dio zerbitzu berriak. 150 metro koadro izatea aurreikusi da.
Horrekin batera, erabilera anitzeko espazioak ere aurreikusi dira Mataderoaren birgaitzean,m elkarteek eta herritarrek bileretarako edo bestelako jardueretarako erabili ahal izango dituztenak.
