Udalaren aniztasun eta inklusio praktikak, urrezkoak
Errenteriako Udalak bi urrezko sari jaso ditu hiri, herri eta eskualdeen inklusioaren eta aniztasunaren aldeko jardunbide onenak saritzen dituen Europako Batzordearen sarietan.
Inklusio eta aniztasun sariak Errenteria taldeaHerri Bizia Harrera herria da Errenteria-Orereta, anitza eta inklusiboa. Ez da horretan zalantzarik, baina jaso berri dituen bi sarik ageri-agerian jarri dute udalaren inklusioaren eta aniztasunaren aldeko jardunbidea aintzat hartu eta aitortzekoa dela. Hala egin du Europako Batzordeak atzo Bruselan banatu zituen Inklusio eta Aniztasun Sarietan. Errenteriako Udalak bi urrezko sari jaso ditu hiri, herri eta eskualdeen inklusioaren eta aniztasunaren aldeko jardunbide onenak saritzen dituen iniziatibaren testuinguruan.
Urrea 50.000 biztanletik beherako toki erakundeen kategorian, eta urrea ere, lan merkatu inklusiboaren alde egindako lana aitortzen duen atalean. Lehenengo kategorian jasotako sariaren bidez Errenteriako Udalak bizilagun berriei egiten dien harrerari egin dio aitortza, “bereziki balioan jarriz guztion oinarrizko eskubideen eta herritartasun osoaren alde egiten duen apustua”.
Aipamen berezia egin diote zentzu horretan, udalak martxan jarri berri duen GÜ harreraguneari, “harrera hobetzeari begira ekarpen garrantzitsua egin baitu”. Bigarren urrezko sariak berriz, hainbat apustu esplizitu aitortu dizkio udalari: tituluak homologatu ahal izatea sektore kualifikatuetan laneratzea bultzatzeko, edota oso feminizatua den zaintza lanak duintzea prestakuntza egiaztatu ahal izatea, lan baldintzak hobetzea eta enplegua erregularizatzea sustatuz.
Bruselako Europako Batzordearen ekitaldian izan ziren Aizpea Otaegi alkatea, Itsaso Cruz Kultur aniztasuneko, Garapeneko Lankidetzako eta Giza Eskubideen zinegotzi, eta Samira Goodi arlo bereko teknikaria. Pozik azaldu da udala jasotako aitorpenarekin, “balioan jartzen baitu Errenteriaren harrera bokazio historikoa eta udalerrian sakon errotutako ibilbide inklusiboa”. Horiek gaur gaurkoz ere funtsezkoak direla gaineratu du “Errenteria kohesionatuago eta berdinzaleago bat” eraikitzen jarraitzeko.
Jasotako aitortza “herri osoari” egina dela gaineratu du udalak: “Inklusioan, kohesioan eta aniztasunean oinarritutako bizikidetzaren alde jarduten den herritar eta eragile ororena”. Hori horrela, sariak modu partekatuan “ospatzeko” asmoa adierazi du.
Bukatzeko orain arteko norabidea mantentzera deitu ditu udalak herrikide, eragile eta bidelagun guztiak, “elkarrekin hiri bizigarria, komunitate kohesionatua eta bizikidetza eraikitzen jarraitzeko”.
